Yu Tao: Estas bone konate de mi ke vi farighis direktoro de la CO de UEA en februaro de 1986, ghenerala sekretario de UEA en 1989, ree direktorighis en 1991, kaj funkciis kiel ghenerala direktoro de UEA en 1996. Do interesas min via esperantistigho, chu ghi okazis antau 30 jaroj?

Osmo Buller: Mi eksciis pri Esperanto el diversaj libroj kaj gazetoj, sed mi decidis lerni ghin dank' al la Esperanto-elsendoj de Pola Radio. Alilandaj radioelsendoj fascinis min, sed char mi ne scipovis fremdajn lingvojn, mi povis auskulti nur al tiuj radiostacioj, kiuj disaudigis en la finna. Unu el ili estis Pola Radio, kies Esperanto-elsendoj donis al mi la ideon lerni tiun lingvon por povi poste auskulti al pli da stacioj. Mi serioze eklernis la lingvon en januaro 1966.

Yu Tao: Chu vi volonte rakontas motivon labori en la CO en 1985, kaj kiel vi esperantumis antau ol labori tie?

Osmo Buller: Mi membrighis en UEA en 1968 kaj baldau farighis junulara delegito kaj poste fakdelegito. Mia unua UK estis tiu en Helsinko en 1969. Ghi estis vere grandioza sperto -- en chiu UK mi envias tiujn, por kiuj ghi estas la unua -- kaj ghi definitive katenis min al nia movado. Mi konkursis pri laborposteno en la CO, char mi de longe volis pasigi iom da tempo laborante eksterlande, kvankam ne nepre en Esperanta medio. En 1985 eblis realigi tiun revon ghuste che UEA, kio min ege ghojigis. Estas ja granda privilegio, ke hobio farighas profesio.

Yu Tao: Post 1987 vi estis en Finnlando kaj revenis al Roterdamo en 1991. Kion vi faris dum tiuj jaroj en via patrolando?

Osmo Buller: Unue mi faris historian studon lau mendo de mia politika partio, sed pli longan tempon mi laboris en Taivalkoski kiel municipa sekretario pri kulturaj aferoj. Tiu loko situas en norda Finnlando kaj tie mi naskighis. Cetere, dum tiu tempo mi kunlaboris kun la fama pola televida jhurnalisto Roman Dobrzynski en la pretigado de la filmo "Reveno al Finnlando". Ghi temas pri la spertoj de pola junulo kiel sklavo de la nazia germana armeo ghuste en la regiono de Taivalkoski. Pola Televido elsendis ghin plurfoje kaj ghi estis sukcese montrita en multaj UK-oj kaj aliaj renkontighoj.

Yu Tao: En intervjuo de Mark Fettes en 1991 vi diris: "Mi sentis ke mia tempo por Esperanto ne sufichas, char iel ghi farighis unu el la chefaj aferoj en mia vivo. Mi sentis min multe pli utila al la movado kiel oficisto ol kiel estrarano." Nun vi estas ghenerala direktoro de UEA, la plej grava oficisto, chu tempo sufichas, au ech pli ne sufichas?

Osmo Buller: Nun ghi definitive ne plu sufichas...

Yu Tao: Vi laboras en la CO dum pli ol dek jaroj, chu vi jam pensas pri reformado de la laboro de la CO kaj de UEA?

Osmo Buller: Kompreneble estas multaj mankoj, sed chefe mankas laborforto pro la limigitaj monrimedoj. La funkciado de la CO ne bezonas kaj ech ne toleras radikalan reformon, char ghiaj chefaj taskoj kaj servoj estas tiel bazaj por UEA kaj por la tuta movado, ke ili ne povas rapide shanghi. Aliflanke, daure okazas malgrandaj shanghoj, tiel ke multrilate nia laboro nun malsamas kompare kun la tempo, kiam mi eklaboris. La oficejo nun estas multe pli efika ol tiam. Imagu, ke antau dek jaroj nia komputilo bezonis unu horon por fari membrostatistikon. Nun ghi faras tion en kelkaj sekundoj. La chefaj shanghoj, kiuj atendas nin en proksima estonteco, devenos el la eblecoj de interreto, al kiu la CO cetere alighis jam fine de 1992. Se temas pri la tuta UEA au nia movado ghenerale, ankau ghi ne bezonas grandan reformon. Esperantistoj nur bezonas vekighi, char tro multe oni dormas. Tial la Komitato nun preparas Kampanjon 2000, kies celo estas levi chie la idean kaj organizan nivelon de nia movado. La unua pasho en tiu direkto estis publikigo de la Manifesto de Prago, kiu ricevis entuziasman akcepton chie. Post Prago mi estas ech pli optimisma ol antaue.

Yu Tao: Dum volontulado en la CO, mi rimarkis, ke la oficistoj estas tre okupitaj, iuj ech ne povas ferii dum kelkaj jaroj, kvankam ili rajtas ferii, kaj vi daure laboras post la laborhoroj, ech ankau en sabato kaj dimancho... Chu tion bone scias la esperantistaro, au ekzistas miskompreno de iuj UEA-membroj pri la peniga kaj sindonema laboro de CO-oficistoj?

Osmo Buller: Ghenerale la esperantistoj scias tion kaj ech esprimas sian apogon kaj kuraghigon en diversaj manieroj. Inter ili estas tiel noblaj homoj, ke oni volonte forgesas la oficialajn limojn de labortempo, kvankam mi ja devas sincere diri, ke kelkfoje estus tamen bone memori ilin...

Yu Tao: Via nomo "Osmo Buller" signifas "juna bela bovisto", chu vi pensas pri iama adiauo al la CO-laboro, au vi restos en la CO kiel chiama juna bela bovisto?

Osmo Buller: Venos iam la adiauo, char mi deziras profesie labori ankorau en mia propra lando. Mi deziras tiam ankau denove aktivi por Esperanto sur loka nivelo, char en chiu movado la bazo estas la plej grava chenero. Sed mi neniam perdos mian amon al la mirinda urbo Roterdamo, ech se mi tamen preferas arbojn al urboj...

Yu Tao: Delonge vi estas sekretario de Belartaj Konkursoj, kaj vi achetas preskau chiun novan libron en la libroservo, chu tio signifas, ke vi tre shatas literaturon kaj kontribuas al E-kulturo per via laboro por Belartaj Konkursoj?

Osmo Buller: Jes, mi chiam shatis literaturon, kaj mi ege bedauras, ke mia laboro ne lasas al mi tempon ekz. recenzi librojn. Ankau la taskon de sekretario de Belartaj Konkursoj mi intencas baldau forlasi, kvankam inter chiuj miaj movadaj taskoj ghi eble estis la plej fascina ghis nun.

Yu Tao: Chu vi povus diri, ke vi estas leganto de EPCh? Tre bonvenas proponoj de vi, profesia esperantisto.

Osmo Buller: Jes, mi estas abonanto de EPCh jam ekde 1968. En la jaroj de la Kultura Revolucio EPCh kauzis al mi embarason, char de chiu numero oni sendis al mi 18 ekzemplerojn, kvankam mi estis la sola esperantisto en la tuta regiono... Post tiu tempo EPCh multe evoluis kaj mi vere ne scias, kion alian konsili al vi ol emfazi la gravecon de daura kontakto kun legantoj, char ili estas por vi la bazo.

Yu Tao: Kiel vi opinias pri la eblaj IJK 1998 en Pekino kaj UK en la komenco de la 21-a jarcento ie en Chinio?

Osmo Buller: Mi estis oficisto de UEA en la tempo de la unua china UK kaj mi volonte estus ankau en la tempo de la dua. Do, mi esperas, ke via invito ne prokrastighos! IJK en Chinio estas ech pli urgha necesajho, char via lando ankorau mankas en la IJK historio.

Yu Tao: Chu ankau iu alia komitato volontulis en la CO?

Osmo Buller: Estis ja multaj volontuloj, kiuj iam poste farighis komitatanoj de UEA. Vi tamen estas la unua, kiu samtempe volontulis kaj komitatanis, almenau se temas pri iom longtempaj volontuloj. Mi estas ege danka al EPCh kaj ChEL, ke ili sendis al ni tiel diligentan laboranton!