Vizito
al templa foiro en la Printempa Festo estas kutimo de pekinanoj.
En temploj oni preghas por peti benon de la dio, spektas prezentadon
de popolaj artistoj, frandas diversajn manghajhojn kaj achetas
metiartajhojn. Kun la progreso de la socio, templa foiro iom
post iom evoluis en folkloran muzeon demonstrantan la popolan
moron de Chinio.
En Pekino templa
foiro okazas kutime en Changdian-strato, la taoisma Dongyue-templo, la taoisma
Baiyun-templo, la Tera Altaro kaj Longtan-parko.
En
la sepa tago de la Printempa Festo mi vizitis la templan foiron en Dongyue-templo.
Pregho
en templo
Dongyue-templo
estas tre fama taoisma templo en Pekino, en kiu oni kultas Dongyue-dion.
Lau taoismo Dongyue-dio estas reganto de la subtera mondo. En
la templo oni kultas ankau multajn aliajn diojn. La templo estas
tre impona. Trans la strato antau la templo staras majesta arkado
el flavaj kaj verdaj glazuritaj tegoloj kaj brikoj. La arkado
altas 7 metrojn kaj larghas dekkelke da metroj. Sur la arkado
estas multaj hirundaj nestoj. Kiam la suno subiras, la hirundoj
revenintaj de serchado de nutrajho viglas chirkau la arkado.
Pasantoj haltas por rigardi la spektaklon kun granda intereso.
En la templo oni kultas
ankau svato-dion. Krome tie oni povas vidi tre diversajn figurojn
de diabloj. Preghantoj kredas, ke vizito al diabloj felichigos
ilin. Oni plej ofte incensas antau Dongyue-dio, ke li prizorgu
la forpasintajn karulojn kaj gardu la vivantojn kontrau malfelicho.
Sennombraj
homoj venas al la templo por peti benon kaj gejunuloj plej shatas kulti svato-dion.
Ili venas al la dio au sola au duope por peti benon al ilia amo. Antau tiu dio
incensas ankau gepatroj, kiuj petas benon por siaj infanoj.
Vent-radetoj
Kelke
da tagoj antau la Printempa Festo vigleco jam regis antau la
templo. Ambauflanke de la strato vicighas standoj de frandajhoj
kaj metiartajhoj, kiuj allogas pasantojn. Mi tre shatas vent-radeton
krakete turnighantan en vento. Ghi estas farita el fadeno kaj
maldikaj paperstrioj chirkauigitaj sur akso fiksita al framo
el sorga tigo. Kiam vento turnas la radeton, maldika latiso
estas movata kaj batadas malgrandan argilan tambureton tirkovritan
per veleno. Ju pli forta estas vento, des pli lauta la sono
de la tambureto.
Oni vendas
vent-radetojn popece au pogrupe. La kolportistoj ofte kunigas kelkajn au dekon
da radetoj. Antau kelke da jaroj, kiam finighis foiro, sur la strato tuj aperis
torento da bicikloj preskau chiu kun vent-radeto. En vento la radetoj audigis
sonoran krakadon dum veturado de la bicikloj. Sed nun oni iras al foiro per auto
au taksio, kaj bicikla torento kun kraketantaj vent-radetoj jam ne estas videbla.
En mia infaneco chiufoje,
kiam mia vizitis templan foiron, mi akiris vent-radeton kiel
la unuan donacon. Mi tre ghuis la scenon, ke kelkaj multkoloraj
vent-radetoj krakadis en mia mano. Mi rigardis vent-radeton
komencigho de nova jaro, kio markis, ke mi kreskis denove je
unu jaro.
Frandajhoj
Chirkau
la 8-a matene, antau Dongyue-templo jam atendis multaj homoj. Che la fronta pordo
de la templo estis multaj standoj de frandajhoj troveblaj ankau en aliaj templaj
foiroj. La vendado de tiuj butikoj plej viglis post la 10-a horo. La plej shatataj
frandajhoj estas kandizitaj kratagaj fruktoj kaj kashtanoj rostitaj en feraj gruzoj
miksitaj kun maltozo.
Mi plej
shatas amelan kachon nomatan "tea supo". Mi gustumis che tri standoj
po unu specon da "tea supo". Parto de la standoj portas elpendajhon
kun la familia nomo de la mastro, ekzemple "Tea Supo de Li-familio"
kaj "Rostita Porkointernajho de Feng-familio", kiuj ghuas renomon en
Pekino.
En la foiro oni povas
frandi tre diversajn manghajhojn, ekzemple fritita kuko kun butero, rostita shafajho-rozario,
flano farchita per azukia pasto¡ Centoj da specoj da frandajhoj chiam
allogas frandemulojn.
Akrobatajhoj
En
la foiro de Dongyue-templo la vizitantoj spektis tre lertajn akrobatajhojn prezentitajn
de akrobatoj de Wuqiao de Hebei-provinco. Multaj elstaraj akrobatoj devenis de
tiu loko.
Antau la fronta pordo
de la templo 6 junuloj ludis dancon de 3 leonoj. En la tria korto de la templo
knabinoj estis prezentantaj bovlopiramidon kaj traringadon. Prestidigitisto altiris
multajn vizitantojn per aperigo de viva fisho.
Elirinte
el la templo, mi ankorau dronis en remachado pri la vidajhoj
en la foiro. Mi achetis rozarion da kandizitaj kratagaj fruktoj.
Frandante la bongustajhon, mi observis la infanojn, kiuj akiris
jam diversajn ludilojn sed ankorau ne volis foriri. Mi rimarkis,
ke ili tenas ne vent-radetojn, sed jhus achetitajn elektronikajn
bestetojn.
Rilata
artikolo: Tradicia templa foiro en
Pekino dum la Printempa Festo