Shi shatas chinan ombroteatrajhon

de LI QIANG

    En la 17-a de septembro, 2002, en Hamburg, Germanio, inaugurighis “China monato”, kiu ampleksis ankau ekspozicion de china ombroteatrajho, speco de la tradiciaj popolaj teatrajhoj de Chinio. Oni faris homfigurojn kaj pejzaghojn el azena, bova kaj shafa ledoj lau bezono de la teatrajhoj. Mi deziris scii, kiel tiu popola arto interesas germanojn, kaj mi direktis min al la Botanika Ghardeno de la Universitato de Hamburg, kie okazis la ekspozicio.

    Mi estis mirigita, ke la ekspozicion aranghis ne chino, sed germana maljunulino.

    S-ino Luise Thomae estis ghia mastro. En chinstila vesto shi varme bonvenigis min che la enirejo. Akompanate de shi, mi rigardis ombroteatrajn siluetojn kolektitajn de shi kaj faris al shi multajn demandojn.

    Plenkreskinte, shi alighis al junula ombroteatro kaj ofte prezentis kune kun siaj kamaradoj. Foje iu doktoro prezentis al ili ombroteatrajhon kaj faris detalan konigon. Li diris, ke la uzitaj siluetoj estas el Chinio, kie la siluetoj konatighas kiel la plej bonaj en la mondo. La brila prezentado de la china ombroteatrajho kaj bela muziko profunde impresis shin. Shi forte interesighis pri Chinio kaj ghiaj ombroteatrajhoj.

    Post emeritigho shi deziris viziti Chinion kaj pli multe koni ghiajn ombroteatrajhojn. En 1988 sekvante turisman grupon, shi venis en Chinion. Char la grupo vizitis kolektive kaj la itinero okupis shin, shi ne efektivigis sian deziron rilate la ombroteatrajhojn. Pro tio shi multe bedauris kaj deziris refoje viziti Chinion. En 1990 por pli bone koni chinajn ombroteatrajhojn shi duafoje venis en Chinion. Shi estis felicha, char chi-foje shi trovis ne nur chinajn ombroteatrajhajn siluetojn, sed ankau aktorojn, kiuj kapablas prezenti la teatrajhojn.

    Shi venis en Chinion entute 8 fojojn kun unu celo: kolekti chinajn ombroteatrajn siluetojn kaj studi la ombroteatron. En Chinio shi vizitis Shaanxi, Sichuan, Hunan kaj Hebei. En la urboj kaj vilaghoj shi faris esploron, dank’ al tio shi akiris profundajn sciojn pri tiu china arto kaj kolektis multe da koncernaj materialoj.

     Inter la ombroteatraj siluetoj kolektitaj de shi estas multe da trezoroj, ekz. silueto farita antau 100 jaroj en Sichuan-provinco. Ech hodiau oni povas per ghi prezenti diversajn movojn: starigho, sidigho, surgenuigho k.a. kaj ghiaj manoj povas karesi la vizahgon. Estas ankau virina silueto en bela vesto. Ghi movighas senghene kaj libere. Inter shiaj kolektajhoj estas ankau rekvizitoj, ekz. granda chinstila domo, kies bestkapa ornamajho che unu ekstremo de la firsto jam perdighis. Por kompletigi ghin shi mem faris kopiajhon imite tiun che la alia ekstremo. Shi diris, ke la diversaj figuroj de la chinaj ombroteatrajhoj estas versimilaj kaj karakterizighintaj kaj lau ilia aspekto oni povas distingi honestajn homojn disde la malicaj. Chiuj chi-foje eksponataj objektoj estas kolektitaj de shi, sed nur parto.

     En 5 jaroj shi 5-foje profundighis en Huaxian-gubernio de Shaanxi-provinco, hejmloko de la chinaj ombroteatrajhoj. Shi havas intiman rilaton kun la gubernia ombroteatro. Shi lernis de ghi kiel fari siluetojn kaj kiel prezenti. Dank’ al lernado che veteranaj artistoj shi ekhavis multajn sciojn pri tiu arto.

     Por ke pli da germanoj interesighu pri chinaj ombroteatrajhoj, en 1996 shi invitis la ombroteatron de Huaxian-gubernio prezenti en Hamburg. La prezentado allogis multe da germanaj spektantoj. Post tio shi gvidis chinajn artistojn fari turneon. En Germanio la teatro prezentis entute 25 fojojn. Shi akompanis ilin dum la tuta turneo kaj foje veturis ch. 800 km. sole en unu tago. Shi akompanis chinajn aktorojn viziti muzeon, pitoreskejojn kaj aliajn vidindajn lokojn. En 2000, helpate de shi, la ombroteatro refoje venis en Germanion por arta festivalo en Berlino kaj pli multe da germanoj ekkonis la chinan ombroteatron.

     La artistoj de Huaxian-gubernio sendis al shi gratulan leteron, informighinte, ke en 2002 shi eksponis la de shi kolektitajn ombroteatrajn siluetojn en Hamburg. En la eksponejo pendis ankau china kaligrafajho, farita de china artisto por laudi shiajn kontribuojn al diskonigo de la china arto.