Bildoj ene de snufboteloj

de SUO FENGQIAO

    Tio estas kristala mondo. Antau mi estas delikataj flakonoj el vitro kaj kristalo, rondaj, longaj, ovalaj, okangulaj, seseghaj kaj kalabasformaj. Ili estas admirindaj precipe pro siaj internaj pentrajhoj, kiuj montras belajn scenojn de la universo: la homfiguroj versimilaj, bestoj viglaj kaj pejzaghoj charmaj. Ghuante la belajhojn, oni demandas, kiamaniere enmeti la pentrajhojn en flakonojn.

     Fakte, la pentrajhoj ne estas enmetitaj, sed faritaj ene de la flakonoj. Ghuste pro tio oni nomas ilin artajho ene pripentrita. La flakonoj estis faritaj el snufboteloj, tial oni nomas la artajhon ankau snufbotelo ene pripentrita.

     Oni diras, ke flartabako estis enkondukita en Chinion de europaj komercistoj kaj misiistoj en Ming-dinastio (1368-1644). Flartabako estas pulvoro el tabakfolio, parfumo, mento kaj aliaj dekkelkaj substancoj. Ghi estas refreshiga. Kvankam ghi estas malofte uzata en Chinio, tamen snufbotelo ene pripentrita kiel artajho ankorau furoras. En la historio ghi servis kiel tributo por suvereno kaj kiel donaco de imperiestro por subuloj, tial ghi iagrade portis la koloron de potenco. Inter la popolanoj ghi servis kiel donaco en signo de amikigho. Tiam oni alte taksis la snufbotelojn el bonaj materialoj. Sed kun tempopaso oni ne plu shatis la botelojn el oro, arghento, agato kaj smeraldo, sed travideblan ujon kun delikata artajho ene. En Qing-dinastio (1644-1911) aperis artajho ene pripentrita kaj pro tio la snufbotelo farighis charma metiartajho kaj konservindajho.

    En Chinio estas multaj skoloj de interna pentrado. Nun Hebei-skolo estas tre vigla. S-ro Wang Xisan estas fondinto de tiu skolo. Li ekshatis la arton jam en sia infaneco. Li estas dischiplo de Ye Xiaofeng kaj Ye Xiaosan, filoj de fama artisto Ye Zhongsan en Qing-dinastio. Komplete posedinte la arton de la majstroj, li formis sian propran artan stilon kaj estas nomata fondinto de Hebei-skolo. La arto de Wang estas karakterizita per versimileco kaj figura animeco. Rigardu, kiel animitaj estas la haroj, rigardoj kaj ridetoj de la portretoj de 39 usonaj prezidantoj, kiujn li faris en tri jaroj. Maje de 1984 Ronald Regan, tiama usona prezidanto, ricevis kristalan flakonon kun sia portreto ene. Li tuj skribis leteron por danki chinajn artistojn. De tiam famighis la artajhoj de Wang kaj lia skolo.

    En 1977 Wang Xisan fondis la Hengshui-an Fabrikon de Specialaj Metiartajhoj en Hebei-provinco, dank' al kio multe disvolvighis Hebei-skolo. La nuna fabrikestro Zhang Rucai estas dischiplo de Wang kaj ankau majstro post Wang. Ech chi tiu konfesis, ke iuj el la artajhoj de Zhang jam superis liajn en tekniko. Zhang estas tre lerta en prezento de la mieno kaj interna spirito de la homo. Lia kristala flakono kun la pentrajho "Feino Chang'e Flugas al la Luno" profunde impresas. Lia alia majstroverko "Auskulto de Muziko" el la china klasika teatro montras la amon de juna paro Zhang Sheng kaj Cui Yingying. Rigardu, kiel absorbite Zhang Sheng ludas la kordinstrumenton gheng-o, dum fraulino Cui Yingying honteme auskultas trans muro. La mieno de la juna paro estas versimila, precipe tiu de la fraulino: arkaj brovoj, belaj okuloj, rughaj lipoj, jadaj harpingloj… chio estas kvazau animita. La verko prenzentas la nivelon de Hebei-skolo.

    Koncerne la fabrikon, Zhang konigis al mi, ke nun en la fabriko laboras 80 homoj, kiuj chiujare produktas pli ol 8 000 diversajn snufbotelojn ene pripentritajn. Ghi estas la plej granda fabriko tiukampe en Chinio. Kvankam tre okupita, Zhang tamen neniam forlasis pentradon. Lia peniko komencas doni belajn bildojn, post kiam li enigas ghin en botelon.