|
Vi, Dabancheng-a
knabino kun longaj harplektajhoj kaj charmaj okuloj, edzinighu
certe al mi, sed ne al iu alia..." La popolkanto "Dabancheng-a
knabino" iam furoris en la tuta Chinio kaj famigis la
urbeton Dabancheng. Zumante ghian gajan melodion, ni veturis
al la urbeto je 70 km sudoriente de Urumqi, grava haltejo
de komercistoj vojaghantaj lau la Silka Vojo en Tang-dinastio(618--907),
por viziti ghiajn historiajn restajhojn kaj knabinojn, kiujn
kantas la kanton.
ANTIKVA
URBO KAJ KNABINOJ KUN LONGAJ HARPLEKTAJhOJ
Dabancheng,
urbeto administrata de Urumqi, areas malpli ol 5000 kvadratajn
kilometrojn kaj havas pli ol 20000 loghantojn ujgurajn, hanajn,
kazahhajn, hujajn k.a. Ambauflanke de ghia nelonga chefstrato
estas sidejo de la urbeta registaro, poshtoficejo, barbierjoj,
restoracioj kaj bazaroj. Bedaurinde, ni renkontis neniun knabinon
kun longaj harplektajhoj en la strato. Mi vizitis barbirejon.
La barbirino estas juna kaj altastatura kun mallongaj haroj
kaj en laumoda vesto. Shi diris, ke nun la knabinoj de la
urbeto estas snobemaj. Multaj el ili estas jam frizitaj. Tial
malmultas knabinoj kun longaj harplektajhoj.
Antikve
Dahancheng estis strategie grava loko kaj ghi famas pro sia
prospero en historio. La norda brancho de la Silka Vojo en
Xinjiang trairis la lokon. Tiam, tie estis 4 urbetoj kaj pluraj
alarmturoj. Pli ol 1000 jaroj forpasis. La alarmturo videble
konstruita el tero kaj fragmitoj apud la vojo farighis nun
termaso alta je malpli ol 5 m. Kaj la urbeto Baishui, sufiche
granda siatempe, havas nun sian kvadratan murbazon el sablomasoj
altaj je pli ol unu m. Chie en kaj ekster ghi estas ovalaj
shtonoj kun grandeco de pugno. La rivero Baishui murmuras
ekster la murbazo.
Nun lau
la Silka Vojo en Xinjiang etendighas shoseoj kaj fervojoj
al suda Xinjiang kaj aliaj lokoj, la konstruata ekspresa autovojo
inter Urumqi kaj Turpan, komunikaj lineoj, telekomunikaj fotokabloj
kaj tuboj por petrolo kaj naturgaso.
VENTO
EN DABANChENG
Vojaghante
en Dabancheng, ni vidis, ke sur la vasta kaj sterila tereno
inter 2 montoj staras dekoj da blankaj "gigantoj"
kun rado malrapide turnighanta surkape. Ili estas vento-energiaj
radoj. En la urbo funkcias la plej granda vento-energia elektrejo
de Chinio.
Dabancheng
situas en la valo inter la meza kaj orienta branchoj de Tianshan-montaro,
kun longo de 80 km de oriente okcidenten kaj largho de 15-30
km de norde suden. Malvarma aerfluo el Siberio en nordo kaj
la varma el dezerto en suda Xinjiang renkontighas en la valo
kaj formas venton, kiu forte blovas al Dabancheng tra la vento-zono
kun areo de 1600 kvadrataj kilometroj.
En Dabancheng
ventas senchese dum la tuta jaro. Posttagmeze la vento blovas
pli kaj pli forte kaj je la 4-a kaj 5-a matene ghi blovas
plej milde. En Dabancheng pli-ol-1000-kvadratkilometra vento-zono
taugas por funkciigi vento-energiajn radojn. La jara vento-energia
rezervo atingis 25 miliardojn da kWh.
En Dabancheng,
la nodo de trafiko kaj telekomuniko por suda kaj norda Xinjiang,
funkcias 2 elektrodrataj retoj, per kiuj oni liveras elektron
al suda kaj orienta Xinjiang.
NOVA
ENERGIBAZO
 Matene,
mi vidis la "gigantojn" silente stari sur la vento-zono.
En la loko je 500 m for de la shoseo estis vento-elektrejo.
Maldekstre de ghia enirejo estis duoncirkla regadejo. Meze
de ghi instalighis komputere regata sistemo. Tra vitromuro
mi vidis, ke padeloj de kelkaj vento-energiaj radoj turnighas
malrapide.
"Jen
estas magia forto de la vento en Dabancheng", diris al
mi ingheniero Wei Chunli. 30-jara li jam estas veterano de
tiu elektrejo. De li mi informighis, ke antau 10 jaroj tie
estis nur malgranda eksperimentejo. Uzante vento-energiajn
mashinojn importitajn el Nederlando kaj Danlando, kelkaj homoj
en ghi provis elektro-produkadon per vento. En la fino de
1992 ekfunkciis la Dabancheng-a Vento-energia Elektrejo. Ghi
kun 33 generatoroj produktas jare elektron de 35.81 milionoj
da kWh.
En tiu
vento-energia elektrejo tute fermita estas regadejo, tensialtiga
stacio, laborejo por mashinmuntado, laborejo por elektra eksperimento,
oficejo kaj loghkvartalo. La vento-energiaj radoj kaj tensialtiga
stacio estas regataj de komputeroj. En la vento-energia elektrejo
laboras entute 22 personoj. Ili chiuj estas fakuloj, kiuj
finis la lernejajn studon antau nelonge. Ordinare ili faras
fakan esploradon en oficejo kaj, kiam vent-radoj misfunkcias,
ili riparas ilin eksterdome. Ili mem preparas manghajhojn.
Vespere, ili ludas kartojn au tablo-tenison, iafoje, trinkas
bieron en malgranda restoracio je unu km fore. Ili traktas
unu alian kiel fratoj.
Nia jhipo
veturis inter la "gigantoj". La ventorado altas
je 30 m kun la bazo chirkaubrakebla kune de 3 homoj. Sekvante
junulojn, mi singardeme suprengrimpis "giganton"
lau la fera shtuparo. Sur la plato en ghi, kiu povas enteni
4-5 homojn, mi vidis, ke chiu padelo longas je pli ol 10 m.
Mi ne povis imagi, kiel ili tiel facile turnighas en vento.
Almontrante
al konteneroj malproksime, iu junulo diris al mi: "En
ili estas padeloj por generatoro kun povo de 600 kW importitaj
el Danlando. Antaue Chinio importis chiujn pecojn de vento
energia rado el aliaj landoj. Nun, ghi kapablas produkti shtalajn
pecojn, tur-strukturon kaj platon de vento-energia rado kaj
chiujn pecojn por generatoro de 300 kW."
BONA
KOMENCO
Sur turo
de ventorado apud la shoseo okulfrapas vortoj: "Produkti
elektron per vento, por protekti la medion." Probable,
kiam antikvaj komercistoj vojaghantaj lau la Silka Vojo plendis
kontrau la ventego kaj la malfacila vojo en Dabancheng, ili
absolute ne imagis, ke post pli ol 1000 jaroj la vento, kiun
ili abomenis, utilos por la homaro.
De la lastaj
jaroj oni pli kaj pli klare komprenis, ke la medi-protektado
estas grava por la homa ekzistado. Pro tio, la tuta mondo
esploras kaj utiligas energiojn sunan, ventan, tervarman kaj
aliajn. La kosto por vento-energia elektro-produktado estas
malalta, tial la produktado disvolvighas plej rapide.
Kompare
kun la landoj evoluintaj en utiligado de vento-energio, Chinio
estas malforta, tamen ghi havas bonan komencon. Fakte, vento-energio
estas vaste uzata en Chinio. En la Autonoma Regiono de Interna
Mongolio, nordorienta Chinio kaj chemaraj regionoj de sudorienta
Chinio trovighas vento-energiaj elektrejoj. En la Interna
Mongolio vento-energia elektro servas chefe al la vivo kaj
produktado de la pashtisoj loghantaj dise. La elektro-produka
tempo de la Dabancheng-a Vento-energia Elektrjo konsistigas
pli ol 84% de tiu de la tuta jaro. La kurbo de taga shargho
kaj tiu de la sistema estas preskau samaj, en kulmino de elektro-uzado
vento-povo kaj elektro-kvanto estas plej grandaj. Kvankam
la elektro produktita per vento-energio konsistigas nur 1%
de tiu de la elektrodrataj retoj, tamen ghi ludas gravan rolon
en regulado sur la reto. Akvo-pumpado per vento-energia elektro
ebligas transformi dezertojn kaj disvastigi herbejojn utilajn
al brutobredado.
La direktoro
de la elektrejo diris al mi, ke en 2000 la generatora kapacito
de la Dabancheng-a Vento-energia Elektrejo atingos 100000
kW. Tiam, aperis en mia imago la sceno: En la loko, tra kiu
pasis la Silka Vojo, centoj da ventoradoj staros en vicoj
sur verda stepo, inter aroj kaj aroj da pashtighantaj shafoj
kaj bovoj...
|
