Hui Shangyi estas 17-jara knabino. Nun shi lernas en la supera tria klaso de la Kvara Mezlernejo de Pekino. Chi-sube legighos shia lernejana vivo.

Shi amas sian lernejon

     En 1983 la sesangulaj klaschambroj, observatorio kaj aliaj domoj estis riparitaj kaj dekoraciitaj, tiel ke la medio farighis pli bela kaj kvieta. En la lerneja korto dislokighas pli ol 100 sonkestoj. En la ripozaj horoj audighas orelplacha muziko. Hui Shangyi estas kontenta, ke shi povas lerni kaj vivi en tiel bela medio.

Shi amas siajn instruistojn

     La instruistoj de la Kvara Mezlernejo de Pekino estas eminentaj kaj la matematikaj instruistoj devas havi pli altan rangon ol magistreco kaj iuj instruaj materialoj estis kompilitaj de la instruistoj mem. Respondante al la politiko de la shtato malpezigi la sharghon de la lernantoj, la lernejo faras penadon, por ke la geknaboj bone posedu la sciojn tuj en la lecionoj. Komence Hui Shangyi ne kutimis ne plenumi la taskojn hejme kaj post klarigo de instruisto shi iom post iom alkutimighis al tiu metodo de memstara lernado.

     Kun granda ghojo shi cheestas la lecionojn. La instruisto de fiziko povas elfosi interesajn aferojn el simplaj temoj konataj por chiuj, kaj li povas etendi la temon de vektoro al la romano "Rughdoma Songho". Kiam la instruisto de geografio instruis artefaritan geografion, li priparolis ankau la urban projektadon. Li organizis diskuton pri reformado pri trafiko de Pekino.

Grupoj A kaj B

     La Kvara Mezlernejo estas fama en la tuta urbo kaj ghi akceptas ekskluzive eminentajn lernantojn. Jam antau 20 jaroj ghi ekpraktikis tian instruadon, ke antau chio ghi observas la lernantojn kaj poste lau la trajtoj de ilia pensado faras instruadon en malsamaj grupoj, ekz. la grupo A konsistas el viglapensaj kaj diskutemaj lernantoj, dum la grupo B el atentemaj, silentemaj kaj diligentaj lernantoj. Hui Shangyi lernas matematikon kaj la anglan lingvon en la grupo A. Shi rimarkis, ke la grupo A dedichas grandan atenton al sugestado kaj sur la nigra tabulo vidighas multe da malgrandaj cirkloj, dum sur tiu de la grupo B legighas bonordaj skribajhoj.

Nedevigaj kursoj

     Hui spertis chagrenon pri elekto de nedevigaj kursoj. En la nomita mezlernejo la nedevigaj kursoj havas du specojn, t.e. la kursoj koncernantaj la studobjektojn, kiaj eksperimento pri chela genetiko, aplikata infinitezima kalkulo, lego de gongfu-romanoj, ekzotaj moroj, gazetara angla lingvo kaj aboco de ekonomiko, kaj la aliaj kursoj rilataj al la artaj kaj sportaj aktivadoj, kiaj chin-stila pentrado, Chen-skola tajghichuan, kalistenio, brigho, vejchio kaj kolektiva socia danco. Lau siaj amo kaj trajtoj shi elektis la kursojn pri eksperimento de chela genetiko, aboco de ekonomiko, Chen-skola tajghichuan kaj brigho.

     Iafoje tagmeze shi lernas manipuli komputilon, kaj shi ellernis aranghon de retpaghoj kaj movbildoj.

Sociaj aktivadoj

     Dum lernado en la Kvara Mezlernejo shi multe partoprenis en la signifaj sociaj aktivadoj.

     Dum la pekina invito de la 29-aj Olimpikoj, la inspekta teamo de la Internacia Olimpika Komitato vizitis la Kvaran Mezlernejon de Pekino. En la agho de 6 jaroj Hui Shangyi eklernis la anglan lingvon kaj flue parolas angle. Tiufoje shi funkciis kiel chicheronino kaj interpretistino de la estro de la teamo. Shi bone montris sian talenton en la laboro kaj pro tio la lernejo laudis shin. Shi akceptis ankau la edzinon de Yertsen el Rusio kaj invitis britajn mezlernejanojn por fari amikecan konkurson de nagho en la Kvara Mezlernejo de Pekino.

     La Kvara Mezlernejo faris amikecan intershanghon kun germana lernejo kaj shi membrighis al la vizitgrupo al Germanio. Shi kaj shiaj kamaradoj traveturis Luksemburgion, Belgion kaj Nederlandon kaj fine atingis Germanion. La vojagho en Europo multe larghigis shian vidkampon.

     Shi partoprenis ankau amikecan viziton al mezlernejo Espero en okcidenta Chinio. La granda diferenco inter la urboj kaj kamparo, inter richeco kaj malricheco profunde impresis shin, ke shi donis pli grandan energion al sia lernado.

Perspektivo

     La geknaboj de la Kvara Mezlernejo de Pekino lernas eminente kaj pli ol duono de ghiaj abiturientoj sukcesas en la ekzameno por Qinghua-universitato, la Pekina Universitato kaj aliaj unuaklasaj universitatoj de Chinio. Ankau Hui Shangyi deziras lerni en Qinghua-universitato.