La tradicia loghantara komitato, konsistanta chefe el maljunulinoj, kiuj ofte “intervenas” en fremdajn aferojn, farighis bona helpanto de la registaro en la batalo kontrau SARS.

     En la komenco post fondigho de la nova Chinio, t.e. en la 50-aj jaroj de la 20-a jarcento, en chiuj urboj de Chinio fondighis loghantara komitato lau dislokigho de la loghantoj, tio estas la fundamenta administra organizo de la chinaj urboj. Siatempe la loghantara komitato konsistas chefe el senlaboraj dommastrinoj kaj iuj emeritoj, fervoraj por la loghkvartala laboro. Siatempe la loghantaraj komitatoj ludis gravan rolon en organizado kaj mobilizo de la loghantoj en la socialisma konstruado kaj beligo de la hejmloko.

     Kun la socia evoluo multe da malaltaj domoj estis anstatauitaj de altaj domoj, sed loghantara komitato restis kiel brancho de la registara institucio. Ghi helpas la registaron en diversaj aktivadoj, kiaj solvo de iuj problemoj en la chiutaga vivo kaj purigo de la loghloko, kaj en 2003 ghi sin jhetis en la batalon kontrau SARS.

     Preskau chiu loghantara komitato estis taskita distribui desinfektajhojn, mezuri korpan temperaturon kaj ne lasi la fremdulojn eble kun virusoj eniri la loghkvartalon.

     La komitato havas registron pri chiuj loghantoj. Ghi estas klara pri ilia okupo: Kie ili lernas kaj kie ili laboras. La china registaro deziras, ke la loghantara komitato ludu sian rolon en rapida trovo de SARS-malsanuloj kaj malhelpo de infektado.

Kontrola reto

     S-ino Cui, 39-jara, estas volontulo de la loghantara komitato. Shi staris che la vojkrucigho kaj observis chiujn pasantojn. Shi diris: “Chiutage tuj post fino de la laboro mi dejhoras chi tie por malhelpi fremdulojn iri en nian loghkvartalon, ke ili ne portu SARS-virusojn al ni.”

     Shi kaj shiaj kolegoj faris la gheneralan laboron por batali kontrau SARS. Chiutage almenau 8 homoj observis surstrate. "Ghis nun en nia loghkvartalo neniu infektighis je SARS," shi diris.

     Iuj loghantaraj komitatoj alprenis pli rigorajn rimedojn. En la urbo Baoding, Hebei-provinco, la loghantara komitato establis kontrolan stacion sur chiu strato kaj chiu volontulo inspektis 10 familiojn kaj donis grandan atenton al kontrolado de la kamparano-laboristoj, revenintaj de epidemiaj lokoj, kaj homoj, kiuj havas simptomojn, similajn al tiuj de SARS. Komence de majo, s-ro James, fakulo de la Monda San-Organizo, diris: “Tio estas komplika kontrola reto.”

Observado

     Jen la korto n-ro 10 de Dongcheng-distrikto, Pekino. S-ro Zhang kun rugha bendo sur la brako diris: “En nia plansetlejo loghas 2000 homoj.” Apud li staris nigra tabulo, kie legighas 4 rimedoj kontrau SARS: “Kiel eble plej baldau rimarku, raportu, izolu kaj kuracu.” Kaj sur alia tabulo legighas: “Hodiau dejhoras s-inoj Zhang kaj Qiao de la tria sektoro.” Oni dejhoris tie kaj mezuris la korpan temperaturon de la pasantoj.

     Tiuj dejhorantoj estis membroj de la loghantara komitato. Kiel estro de la komitato, Zhang respondecis pri observado. Tio ja ne estis facila laboro, char chiutage ili devis labori 16 horojn.

Aparta tasko

     En la lastaj jaroj la loghantaraj komitatoj multe shanghighis: Ili havis membrojn multe pli junajn kaj iuj junaj homoj, finintaj studon en altaj lernejoj, eklaboris en tiu organizo. Ili energie rekomendis al la senlaborighintoj novan okupon, faris multon por richigi la kulturan vivon de la loghantoj kaj prizorgis maljunulojn.

     La loghantaraj komitatoj funkcias kiel helpantoj de la registaro. Nun ili faras multon por propagandi kaj ekspliki la politikojn de la Centra Registaro. La 5 kadroj de la komitato de la korto n-ro 10 faris brilan ekzemplon chi-flanke. S-ro Zhang diris: “Chiuj loghantoj subtenas nian laboron kaj chiu domo havas dejhoranton. La batalo kontrau SARS plifortigis nian amikecon.”

Kontento de MSO

     Hebei-provinco, limtushanta Pekinon, havas 65 milionojn da loghantoj kaj tie estis 177 SARS-malsanuloj. Tie ne estis evoluinta medicina reto nek avangarda komputora sistemo, tamen mobilizante chiujn fortojn, ili penadis por malhelpi disvastighon de SARS.

     S-ro James estis taskita de la Monda San-Organizo por inspekti Hebei-provincon pri SARS. Post la inspektado li diris, ke kvankam la metodo ne estas scienca, tamen en la disvolvighantaj landoj kun granda loghantaro, kia Chinio, ghi estas efika. Li diris ankau, ke li kaj liaj kolegoj vidis viglan defendsistemon kontrau SARS. La medicinistoj ne nur zorgas SARS-malsanulojn en hospitaloj, sed anaku serchas SARS-malsanulojn en chiuj urboj kaj vilaghoj. Ankau alia fakulo de MSO montris sian kontenton. Li diris, ke tiu chin-stila laboro multe kuraghigis ilin.