Alumetmarkoj de Rao	Bildo "Che la Tago de Klaro kaj Brilo" formita de alumetmarkoj
Rao kaj lia edzino	Valoraj alumetmarkoj de Rao

    Mi konatighis kun Rao Guoshun antau 10 jaroj, kiam li okazigis ekspozicion pri siaj alumetmarkoj. Tiam li ankorau ne havis multe da scioj pri la alumetmarkoj kaj shatis ilin nur pro ilia bunteco.

Pli ol 20 jarojn por kolektado de alumetmarkoj

    En la posttagmezo de iu dimancho mi vizitis lin. En lia hejmo alumetmarkoj vidighis chie sur la tablo, lito kaj planko. Li diris al mi, ke tio konsistigas nur malpli ol sesonon de liaj kolektajhoj.

    Li ordigis la objektojn kaj kun granda ghojo konigis al mi elementajn sciojn pri la markoj. Li diris, ke la unua alumetmarko estis projektita de anglo en 1837, je 3 jaroj pli frue ol la unua poshtmarko. La unua china alumetmarko aperis en Kantono en 1879.

    En 1976 Rao eklaboris en fabriko de alumetoj de la urbo Qimen, Anhui-provinco. Tiam la fabrikestro ofte ricevis leteron por peti alumetmarkojn kaj komisiis al li trakti tiujn leterojn. En tiuj leteroj ofte estis kunsenditaj delikataj markoj por intershangho. Rao tre shatis ilin kaj bone konservis ilin kiel valorajhojn. Li tion faris en pli ol 20 jaroj kaj kolektis pli ol 60 mil alumetmarkojn chinajn kaj alilandajn.

Abundo de alumetmarkoj

    Ghuante la alumetmarkojn konservitajn de Rao, mi kvazau legis bele presitan miniaturan bildlibron au enciklopedion. La 80 markoj de mondfamaj pentrajhoj konservitaj en Luvro, produktitaj en Wuhan, estas versimilaj artajhoj. Inter ili estas eminentaj pentrajhoj "Mona Lisa" kaj "Fonto". La 28 markoj formis la antikvan chinan pentrajhon "Che rivero en la Tago de Klaro kaj Brilo", kiu konigas la popolan vivon de Song-dinastio (1101-1119). La shminkitaj vizaghoj de pekina opero produktitaj de la Tianjin-a Fabriko de Alumetoj konsistas el 450 pecoj, kiuj bone montras la arton de pekina opero.

    Rao bone konas la historion de chinaj alumetmarkoj. Li montris al mi alumetmarkon produktitan antau tre longe, sur kiu estas presitaj la vortoj "Farita en Chinio" kaj "Uzu chinajn varojn kaj reakiru niajn rajtojn". De tio ni konas, ke la chinoj faris grandan penadon por vigligi la nacian ekonomion jam en la 20-aj kaj 30-aj jaroj.

    Rao diris al mi, ke la alumetoj havas multe da funkcioj kaj specoj. Krom la chiutage uzataj alumetoj estas ankau alumetoj marnavigaj, kontrauventaj, humid-imunaj, signalaj kaj turismaj. Li prenis skatolon da alumetoj 28 cm longaj kaj diris, ke en iuj europaj kaj amerikaj landoj oni hejtas la domon per kameno. Por faciligi la bruligon, oni produktis longajn alumetojn, kiuj povas bruli 2 minutojn. Li prenis ankau dentpurigan alumeton kaj diris, ke nun oni produktas tiun specon da alumetoj, kiuj povas esti uzataj ankau kiel dentpurigiloj. Tiajn alumetojn estas tre malfacile kolekti.

Li deziras eldoni libron

    Kun tempopaso Rao havas pli kaj pli abundon da scioj pri alumetmarkoj kaj li jam ne kontentas pri sola kolektado de la markoj, sed mem komencas projekti ilin. Li jam projektis 23 seriojn da bildoj de alumetmarkoj. La valoraj alumetmarkoj projektitaj de li en 1987, t.e. 10 pejzaghoj de Huangshan-monto, estis premiitaj en la konkurso de fabrikaj markoj de la tuta lando.

    Rao deziras ankau eldoni libron pri alumetmarkoj. Mi esperas, ke realighos lia deziro.