Nupto de Baj-nacio dauras 3 tagojn. En la unua tago la familio de la novedzo donas parton de la bezonajhoj por la nova vivo kaj 8 pladojn al la familio de la novedzino por esprimi prizorgon al la novedzino. En la dua tago okazas ceremonio de geedzigho. En la tria tago la novedzino reiras al la hejmo de la gepatroj.

    En la unua tago, lau la tradicio, la novedzo kaj liaj kamaradoj rajdas sur chevaloj al la hejmo de la novedzino, dum la novedzino devas veni al la hejmo de la novedzo per palankeno. Sed nun tiu kutimo multe shanghighis. Malgrau tio shi nepre devas kunporti du objektojn: sunokulvitroj kaj ronda speguleto sur la brusto. La sunokulvitroj povas kovri la larmantajn okulojn, kaj la speguletoj estas amuleto.

    Kiam la novedzino venas al la hejmo de la novedzo, la novgeedzoj devas riverenci al la gastoj de maljuna generacio de la novedza familio. Post tio la novedzino donacas al la familianoj de la novedzo la de shi broditajn kapkusenojn kaj tolajn shuojn. La novgeedzoj devas cheesti bankedon kune kun la gastoj. La gastoj starigas al ili malfacilajn demandojn au petas ilin fari amuzan prezentadon.

    Vespere la familio de la novedzo invitas chiujn grandaghulojn de la vilagho al kundrinkado. La infanoj bruligas sur fenestrobreto pipran pulvoron kaj forte ventumas la fumon en la chambron de la novgeedzoj. En gaja bruado kaj tusado la novgeedzoj elsendas tra fenestro bombonojn, biskvitojn kaj melonsemojn.

    En la tria tago la novedzino frue iras al la gepatroj. Kaj vespere bofratino kaj svatinto venas revenigi la novedzinon. Kaj la novedzino devas foriri en ploro por esprimi dankon al la gepatroj kaj gefratoj kaj bedauron pro la disigho.

    Interese estas, ke en la tria tago ankau la novedzo povas iri al la hejmo de la novedzino kune kun siaj dekkelkaj parencoj. Lau moro la novedzo kaj liaj parencoj povas ion kashi dum la festeno, kaj la familiano de la novedzino intence metas sur la tablon superfluan paron da manghbastonetoj aludante, ke la novedzo povas ghin forporti, char lia familio havas novan membron. Reveninte hejmen, la parencoj de la novedzo shanghas la kashitan objekton kontrau donaco de la novedzino. Tiu moro pli gajigas la nupton.

Rilata materialo: Baj-nacio