MALFELIChAJhO

    Posttagmeze de la 23-a de januaro, Tian'anmen-placo en Pekino.

    Sceno 1. Je la 2-a kaj 41 minutoj posttagmeze, nordoriente de la placo, pli-ol-40-jara viro sidis kun la kruroj krucitaj, vizaghe al nordokcidento kaj vershis likvajhon el verda botelo sur sian korpon. Flamo tuj levighis. En la flamo li kriis el sia tuta gorgho: "La universa legho estas praktikinda por chiuj." Vidinte tion, 4 dejhorantaj policanoj tuj kuris al li, tenante fajrestingilon. Spite la flamon, iu policano pafis sin tien kaj kovris la kapon kaj korpon de la sinbruliganto per fajrestinga tapisho, dum la sinbruliganto daure kriis, forte forpushante la tapishon por rifuzi la savon. En la dauro de malpli ol unu minuto la policanoj eluzis 4 fajrestingilojn kaj finfine estingis la flamon sur la korpo de tiu viro.

    Sceno 2. Preskau samtempe kun tio, en norda parto de la placo, 4 virinoj ekbruligis benzinon sur sia korpo kaj la dancantaj flamoj farighis pli kaj pli fortaj, blovate de la vintra vento. En la sama momento ili farighis fajraj globoj. Ili dolore kuras sur la placo, korshire kriante. Brulanta maldika knabineto kun ploro kriis al la alrapidanta policano: "Ochjo, savu min!"

    Sceno 3. En la sama momento en nordoriento de la placo mezagha virino subite elposhigis plastan botelon Sprint, rapide trinkis kelkfoje la likvajhon kaj vershis ghin sur sin. La malagrabla benzina odoro tuj disportighis. Dejhoranta policano senhezite pafis sin al shi, forprenis shian fajrilon kaj ghustatempe chesigis shian provon de sinbruligo. Shi tamen kriis: "For de mi! Lasu min chieliri! Mi chieliru!"

    Sceno 4. En nordokcidento de la placo, dejhoranta policano rimarkis du plastajn botelojn Sprint plenajn de benzino su la korpo de la maltrankvila mezagha viro, en kies posho estis ankau fajrilo kaj lamenrazilo.

    En tiu okazajho unu virino mortis de sinbruligo, 4 serioze brulvundighis kaj 2 aliaj ne sukcesis en sinbruligo pro ghustatempa haltigo.

URGHA SAVO

    Post malpli ol 7 minutoj tri ambulancoj de la Urghsava Centro de Pekino atingis la placon kaj portis la brulvunditojn al Jishuitan-hospitalo, la plej bona hospitalo en Pekino por kuraci brulvundon.

    Inter la brulvunditoj la 19-jara studentino Chen Guo estis plej serioze vundita. La areo de shia brulvundo atingis 80% kaj brulvundo de la tria grado estis 5%, dum shiaj kapo kaj vizagho estis brulvunditaj je la 4-a grado. Shi estis en shoko.

    La 12-jara knabino Liu Siying estis brulvundita je 40%. La brulvundo de shiaj kapo kaj vizagho estis de la 4-a grado kaj shiaj vizagho kaj manoj fundamente detruighis de la brulado.

    Ankau Hao Huijun kaj Wang Jindong ricevis enspiran vundon kaj seriozan brulvundon.

    Jishuitan-hospitalo tuj fondis urghsavan grupon el eminentaj fakuloj kontrau brulvundo kaj faris partiklan hautan grefton. En la savado la brulvunditoj bezonis urghan sango-transfuzon. Helpate de koncernaj departementoj oni prenis 10 000 mililitrojn da plasmo kaj milojn da ml. da sango el la centra sangprovizejo de Pekino. Multe da kuracistoj kaj flegistinoj, ghuantaj feriojn de la Printempa Festo, tuj revenis al la hospitalo por la urgha savado.

    La hospitalo cedis specialajn chambrojn, kie oni faras 24-horan kontrolon kaj flegadon.

    Char la vundo estis ekstreme serioza, Chen Guo povis engluti nur iomete da lakto. Flegistino do nutris shin guton post guto el lakta botelo. Foje Chen Guo subite ruktis sufokite kaj spasme konvulsiighis. La malpurajhoj komplete shprucighis el shia gorgho sur la vizaghon de flegistino Hai Xiufang. La flegistino lavis sian vizaghon kaj daure nutris shin. La blindighinta knabino Liu Siying en doloro murmure esprimis deziron havi pupon. Flegistino tuj achetis por shi ludilon ursido, kiu povas audigi belan muzikon. Chiufoje, kiam oni faris al shi injekton, oni disaudigis la muzikon por mildigi shian doloron.

    Dank' al plenenergia savado far la kuracistoj kaj flegistinoj, la brulvunditoj jam travivis shokon. La direktoro de Jishuitan-hospitalo diris, ke kvankam la stato de la brulvunditoj estis stabila pro la urgha savado, tamen tio ne signifas, ke ili estas komplete savitaj, char plurfojaj elcikatrigho kaj hauta grefto atendas ilin, dume ili eble suferos de kolapso de pluraj internaj organoj, infekto, hemoragio kaj aliaj dangheroj, tial oni ne povas diri, ke ili jam elliberighis el danghero. Nun ili estas daure kuracataj en la hospitalo.

FONO

    Esplorado konstatis, ke tiuj 7 homoj, kiuj volis sin bruligi, chiuj venis el la urbo Kaifeng, Henan-provinco. Ili chiuj estis Falungong-maniuloj. Wang Jindong, organizanto kaj partoprenanto de tiu evento, komencis sin ekzerci per Falungong en 1996. La 19-an de decembro de 2000 li kun siaj du aliaj familianoj venis al Tian'anmen-placo kaj elmontris transversan tukon por propagandi Falungong.

    S-ino Hao estis muzika instruistino en mezlernejo. Shiaj kolegoj diris, ke antaue shi estis diligenta en la laboro kaj serena en la vivo. Krome, shi estis kantema kaj dancema. Sed de post 1997, kiam shi komencis sin ekzerci per Falungong, shi farighis iom post iom silentema, senzorgema kaj malvigla. Influate de shi, ankau shia filino Chen Guo, studentino 2a-klasa en la Centra Konservatorio en Pekino farighis maniulo de Falungong. Liu Siying, la plej juna el la sinbruligintoj, estis 12-jara. En tiu tragiko shi perdis sian patrinon por eterne.

    Liu Baorong, kiu ne sukcesis en sinbruligo, estis laboristino. En 1984 pro laborakcidento shi forlasis sian laboron kaj oktobre de 1995 komencis sin ekzerci per Falungong. Koncerne la chi-fojan okazajhon, shi diris: "Li Hongzhi ripetfoje diris, ke iuj ankorau ne eliris. Se mi ankorau ne eliros, do mi ne efektivigos la veran perfektighon." Shi opiniis, ke la tiel nomata perfektigho ja estas iri en paradizon. Tio estas bonega afero kaj kompreneble ne kauzos doloron. Pro tio shi trinkis benzinon sur Tian'anmen-placo.

    La 57-jara Liu Yunfang estas portempa laboristo. Li diris: "Hejme mi preparis chion por min bruligi kaj eniri en la paradizon."

PLANADO

    Antau ol veturi al Pekino, ili faris zorgeman preparadon. Ili interkonsilighis pri la dato kaj loko de sinbruligo. Wang Jindong achetis por ili biletojn por trajn-veturo. Kunvojaghis ankau s-ino Liu Chunling kaj shia filino Liu Siying. Sur la kajo, kiam la trajno ekmovighis, tiuj 6 maniuloj diris al alia Falungong-maniulo: "Ghis revido en la paradizo!"

    Matene de la l7-a, Chen Guo atendis ilin en la Pekina Okcidenta Stacio kaj loghigis ilin en loghdomo, antaue preparita por ili, kaj planis sin bruligi sur Tian'anmen-placo antauvespere de la Printempa Festo.

    Por garantii la sukceson, ili malofte eldomighis kaj manghis nur pretajn manghajhojn, achetitajn en proksima superbazaro. Tiamaniere ili sin kashis 7 tagnoktojn. Najbaro diris: "Ni opiniis, ke la domo estis vaka. Ni ne vidis homon en ghi."

    En strecha preparado tiuj maniuloj komplete absorbighis en la bela songho pri chieliro. Ili kuraghigis unuj aliajn. Juna Chen Guo timis, ke la bruligo kauzos doloron. Wang Jindong konsolis: "Doloro estas sento de karnuloj, sed ni Falungong-ekzercantoj tion ne sentas kaj ni tuj enparadizighos."

    La 56-jara Liu Yunfang konigis al la 12-jara Liu Siying, ke la paradizo estas belega, chie tie estas oro. La stratoj estas pavimitaj per oro, la arboj estas oraj kaj chio estas ora. Enparadizighinte, oni farighos regho servata de multaj."

    Post la okazajho, oni trovis en ilia provizora loghejo librojn, sonbendojn, bildbendojn, magnetofonon kaj cirkulerojn pri Falungong.

    Por sinbruligo ili faris zorgeman preparadon. Wang Jindong, 50-jara, iam laboris kiel shoforo. Li proponis sin bruligi per benzino. Li kaj Liu Yunfang achetis benzinon, Hao Huijun achetis lamenrazilojn kaj fajrilojn. Ili tranchis la internan poshon de mantelo, ligis plastan sakon plenan de benzino al sia talio por facile bruligi la plastan sakon.

    Post plurfoja provado, ili rimarkis, ke la plasta sako ne estas lik-imuna. Por eviti fushon Liu Baorong proponis uzi plastan botelon Sprint anstatau plasta sako por teni benzinon. Shi diris, ke la trinkajho Sprint similas al benzino kaj estas malfacile rimarkebla. Ili decidis la horon kaj lokon por sinbruligo. Por garantii la sukceson de bruligo, chiu el ili preparis du fajrilojn.

    Antautagmeze de la 23-a ili achetis keston da trikajho Sprint. Ili elvershis la trinkajhon kaj enboteligis benzinon. Post tio ili veturis al Tian'anmen-placo per taksio, portante lamenrazilojn kaj fajrilojn. Char tiam la Popola Halo estis okupata kaj sur la placo estis multe da automobiloj parkitaj, tiel ke la placo estis portempe fermita. Ili do pasumis proksime. Posttagmeze, kiam la placo estis malfermita, ili do komencis praktiki la planon...

    Liu Baorong diris, ke lau la plano en la dua horo kaj duono la sep homoj devis fari fajron en malsamaj lokoj. "Sed mia horlogho malbone funkciis, vidinte, ke aliaj ne agis, mi do elprenis la botelon Sprint," shi diris. "Estis policanoj, kiuj savis min."

    Liu Yunfang diris, ke apenau li ekbatis la fajrilon, policano haltigis lin.

PENTO

    Rememorante la absurdan kaj tragikan aferon, Liu Baorong sentis grandan bedauron. Shi diris: "Lau argumento de Falungong, kiam oni atingas certan nivelon post memkulturado, che la sinbruligo la fumo devas esti blanka kaj en nur palpebruma dauro oni levighos al la chielo, tamen mi vidis, ke kiam ili sin bruligis, la fumo estis nigra. Tio estis tute ekster mia atendo."

    "Kio instigis vin bruligi vin sur Tian'anmen-placo?" demandis jhurnalisto.

    "Li Hongzhi diris en la sutro, ke malzorginte la vivon kaj morton, kaj ne tolerinte, oni iras al perfektigho."

    "Kial vi decidis agi sur Tian'anmen-placo?"

    "Oni diris, ke maljunulino, Falungong-ekzercanto, en nordoriento de nia lando songhis, ke sur Tian'anmen-placo estas tabulo kun skribajhoj 'Anoncejo de dischiploj de Falungong', tial ni elektis tiun lokon."

    "Kial vi kredas shian songhon?"

    "Ni ja estis superstichaj kaj obstinis en tio. Ni opiniis, ke nur en tiu loko ni povos montri, ke ni estas maltimema je morto kaj povas chieliri al la paradizo."

    "Kia estas la tiel nomata paradizo?"

    "Tie chio estas ora. La stratoj estas oraj, birdoj oraj kaj ankau la homa korpo estas ora."

    "Chu vi kredas nun?"

    "Tio estas centprocenta mensogo."

    "Kiel vi rigardas la homan vivon post tiu malfelicho?"

    "La vivo ja esas valora. Ni ne devas forlasi nian vivon pro adoro al iu ajn. Ni vere eraris. Nun Li Hongzhi vivas sian vivon feliche, dum ni multe suferas."

    En Jishui-hospitalo la jhurnalisto vidis Chen Guo, kiu brulvundighis tutkorpe. Shi, bela knabino, antaue bone ludis bivon, sed nun povas komuniki kun ni nur per kapjeso kaj kapskuo.

    "Mi audis, ke en lernejo instruistoj kaj kunlernantoj chiuj shatas vin."

    Shi kapjesis.

    "Chu vi antaue ekzercis vin per Falungong?"

    Shi kapjesis.

    "Chu daurigos vian ekzercadon?"

    Shi kapskuis.

    "Chu vi bedauras?"

    "Ho vere," shi malfacile elbushigis du vortojn.

    "Chu vi volas ludi muzikilon?"

    Shi kapjesis. Tamen shiaj karbighintaj manoj montris, ke ludi muzikilon por shi estos iluzio.

    Liu Siying, la 12-jara knabino, vivis en la sama chambro kun Chen Guo. En la unuaj tagoj, post kiam ili atingis Pekinon, ili chiam vivis kune. Sed nun vivante en la sama chambro, ili ne vidis unu la alian.

    "Chu vi sentis doloron che via bruligho?"

    "Tre."

    "Sed kial vi bruligis vin mem?"

    "Mi ne sciis, ke tio kauzos doloron."

    "Kia estos la mondo, al kiu vi deziris iri?"

    "Tre bela mondo."

    "Kial vi ne realigis vian belan songhon?"

    "La patrino trompis min." Kushanta en la lito, shi diris la korshirajn vortojn, kvankam shi estis obeema knabino.