Preskau en chiu universitato de Chinio estas malrichaj studentoj. Krom penado en la lernado, ili devas cerbumadi ankau pri lernopago kaj vivtenado. Kun universitata insigno ili estas studentoj kaj ekster la lerneja korto ili estas laboruloj. Per laboro ili lukras por sia vivtenado.

    En Chinio ili estas aparta grupo de homoj, kiuj aperis meze de la 90-aj jaroj. Enketo en 1996 montris, ke tiam en Chinio lernis miliono da malrichaj studentoj, el kiuj 30% estis ekstreme malrichaj. En la sekvantaj 5 jaroj tiu procento kreskis rapide kaj nun en iuj altaj lernejoj preskau duono da studentoj estas malrichaj.

    Oni supozas, ke ili nun konsistigas kvaronon de la chinaj studentoj kaj nun estas 3 milionoj da malrichaj studentoj.

    Kial pli kaj pli multighas malrichaj studentoj? Lau analizo tio kauzighis de malekvilibro de la ekonomia disvolvigho en diversaj lokoj de Chinio.

    La enketo en Pekino, Shanhajo kaj Shaanxi montris, ke kreskas la nombro de malrichaj studentoj devenintaj de urboj, kiuj jam konsistigas 50% de la totala nombro de la malrichaj studentoj.

    La 3 milionoj da malrichaj studentoj prezentis problemon ne nur al la lernejo, sed ankau al la tuta socio. Kiel helpi ilin en la malfacila tempo? Kiel kulturi en ili sanan psikon kaj noblan karakteron? Kiel starigi ilin sur la sama starta linio kun aliaj studentoj che ilia diplomitigho?

    La china registaro atentis la problemojn jam antau longe. La shtata stipendio favoris la malrichajn studentojn. Krom tio iuj sociaj organizoj kaj richaj homoj memvole helpas ilin finance. Tio estas multe vidata en la china socio. La china registaro nun dedichas grandan atenton al likvido de la malekvilibro de la ekonomia disvolvigho de diversaj lokoj kaj komencis la ekonomian reformadon de la kamparo kaj reformadon de la sistemo de shtataj entreprenoj de urboj, por ke pli kaj pli da malrichaj homoj liberigu sin el malricheco.

Shtata stipendio

    Por helpi la malrichajn studentojn Chinio fondis sistemon de shtata stipendio.

    La sistemo estas destinita por helpi malrichajn kaj eminentajn studentojn.

    Lau budgheto chiujare la shtato elspezas 200 milionojn da juanoj por helpi 60 mil malrichajn studentojn. La stipendiuloj devas esti eminentaj kaj malrichaj lau jughado de koncernaj departementoj.

    La sistemo estas praktikata de chiuj ordinaraj altaj lernejoj de Chinio.

    Nun en altaj lernejoj de Chinio oni solvas la malfacilon de malrichaj studentoj ankau per studenta kredito, postleciona laborado, financa helpo kaj malpliigo au nuligo de la lernopago.

Socia helpo

    Foje en agado de entreprenoj por helpi malrichajn studentojn en Hunan-provinco 25 malrichaj studentoj ricevis 0.8 milionon da juanoj.

    En tiu agado studentoj diris: "Kvankam mi ne estas eminenta, tamen diligenta. Kredu min kaj donu al mi shancon. Hodiau vi helpas min en mia lernado kaj morgau mi helpos vin en via kariero."

    La Transmara China Eduka Fonduso en Houston helpis 636 malrichajn element- kaj mezlernejanojn sur la cheftero de Chinio en 2001.

    Ghis nun la fonduso jam helpis malrichajn chinajn geknabojn 2000 homfojojn kaj sole en 2002 ghi helpis 1000 malrichajn geknabojn, por ke ili povu daurigi sian lernadon. La helpitaj geknaboj lernas en 15 provincoj kaj autonomaj regionoj sur la cheftero de Chinio.

    La fonduso naskighis en Kalifornio, oktobre de 1992 kaj estis registrita aprile de 2001 en Teksaso. La membroj de la fonduso estas transmaraj chinoj el la cheftero de Chinio, Hongkong, Taiwan kaj chinaj elmigrintoj en Sudorienta Azio. Ili estas profesoroj, entreprenistoj, advokatoj, mastroj de restoracioj kaj aliaj, kiuj chiuj estas patriotaj kaj fervoraj por la eduka afero de la patrio. Dum longaj jaroj ili entuziasme faris tiun aferon kaj leueble helpis malrichajn geknabojn en Chinio.

    Krom tio 1750 malrichaj kaj eminentaj studentoj ricevis stipendion de la Eduka Fonduso de Zeng Xianzi en 2001.

    S-ro Zeng donacis 100 milionojn da Hongkong-aj dolaroj por helpi la chinan edukadon kaj kunlabore kun la Eduka Ministerio de Chinio fondis la fonduson en 1992. La fonduso premiis 7030 eminentajn instruistojn en 1993-1999 kaj la totala sumo atingis 45.03 milionojn da juanoj.

    Antau nelonge la fonduso decidis nomliston de premiotaj studentoj kaj por tio ghi elspezos 6.4 milionojn da juanoj.