En 1996, sur mapo eldonita de Usono unuafoje trovighis nomo Pudong.

    Tiu, kiu en la komenco de la 90-aj jaroj vizitis Pudong, eble ankorau memoras ghiajn vilaghojn. Nun, se li staras sur la televida turo "Orienta Perlo" 468 metrojn alta, li povas vidi, ke anstatau la vilagha pejzagho, chielskrapantoj kaj movoplenaj stratoj kontrastas kun la malnova urboparto okcidente de Huangpu-rivero.

    Jes, dank' al reformado en la pasintaj jaroj la ekspluata distrikto Pudong multe shanghighis.

    PUDONG KIEL EKSPLUATA DISTRIKTO

    Pudong, kun areo de 522 kvadrataj kilometroj, situas che la enmarigho de Yangzi-rivero, en kiun enfluas Huangpu-rivero. Antaue trans Huangpu-rivero ne estis ponto au tunelo, Pudong estis multe postighinta en ekonomio kaj kulturo kompare kun lokoj okcidente de la rivero. Nun kiel ekspluata distrikto de Shanhajo, Pudong rimarkinde progresas.

    En la okuloj de antikvaj kaj nuntempaj strategiistoj Yangzi-rivero estas drako antauenpushanta la chinan ekonomion; kaj Shanhajo, che la enmarigho de Yangzi-rivero, estas la draka kapo. Jam en la 20-30-aj jaroj ghi estis internacia komerca kaj financa centro, la plej granda en Azio. Tamen pro historiaj kialoj la ekonomia potenco de Shanhajo malfortighis. En la 80-aj jaroj, kompare kun la sudaj chemaraj urboj, kia Shenzhen (Shenghen), kiuj la unuaj komencis reformadon, la progreso de Shanhajo estis malpli rapida.

    Kiel do profundigi la reformadon en Shanhajo? En la 90-aj jaroj, kiam efikis la pordmalfermo de sudo al nordo, de chemaraj lokoj al la landinterno, farighis pli grava la akcelo de ekspluatado kaj pordmalfermo de Shanhajo. Char al ghia malnova urboparto mankis sufiche da spaco, oni elektis Pudong kiel ekspluatan distrikton.

    Kun superaj ekonomia bazo, kapabluloj, tekniko kaj administrado de la malnova urboparto kaj vasta spaco de Pudong, Shanhajo sin malfermis al la tuta mondo. En la pasintaj 8 jaroj Shanhajo enkondukis 16000 programojn investitajn de aliaj landoj, subskribis interkonsentojn por utiligi alilandajn kapitalojn de 50 miliardoj da usonaj dolaroj kaj efike plibonigis la industrian strukturon.

    Utiligante siajn specialajn richfontojn kaj favorajn politikojn, la frue fonditaj ekonomiaj ekspluataj distriktoj en la chemaraj malfermitaj urboj, inkl. de Shanhajo, enkondukis alilandajn kapitalojn, avangardajn teknikojn kaj administrajn spertojn kaj plenumis la plibonigon de teknikoj kaj industria strukturo. Tiamaniere formighis en Chinio malfermitaj ekonomiaj distriktoj de diversaj tipoj. Surbaze de tiuj spertoj oni lanchis pli grandskalan sintezan ekspluatadon kaj pordmalfermon en Pudong, por ke ghi antauenpushu la ekonomian disvolvighon en la tuta baseno de Yangzi-rivero.

    KVARTALOJ EN PUDONG-DISTRIKTO

    La ekspluata distrikto Pudong konsistas el kvartaloj de financo kaj komerco, poreksporta prilaboro, neimpostado, altteknologio, moderna-agrikultura ekspluatado, industrio, kulturo kaj turismo, kaj moderna vivo.

    Starante sur la financa strato de Waitan kaj rigardante orienten al Pudong trans Huangpu-rivero, oni antau chio povas vidi la kvartalon de financo kaj komerco nomatan Lujiazui. En Chinio ghi estas la ununura kvartalo nomata per financo kaj komerco. En tiu "ora triangulo" kun areo de 28 kvadrataj kilometroj, koncentrighas pli kaj pli multaj esencaj merkatoj, chinaj kaj alilandaj financaj institucioj, transnaciaj korporacioj kaj staboj de grandaj chinaj entreprenoj. La kvartalo kune kun Waitan formas la komercan centron, plej aktivan en Shanhajo.

    Auguston de 1995, la Shanhaja Filio de Fuji-banko de Japanio kiel la unua alilanda banko ekfunkciis en Pudong. La Administra Komitato de Pudong-distrikto pro tio donacis al ghi skulptitan lignan chevalon, signifantan ke "unu chevalo sturmas, dek aliaj sekvas". Sekve de tio, bankoj de Tajlando, Usono, Japanio, Britio ktp. unu post alia translokis en Pudong sian filion. Nun pli ol 50 alilandaj bankoj, valorpaperaj kaj asekuraj institucioj enloghighis en Pudong, 9 el la alilandaj bankoj ricevis la licencon pri Renminbi-servado. Tio signifas, ke la malfermo de la china financo faris epokfaran pashon.

    La kvartalo de poreksporta prilaboro nomata "Ora ponto" celas enkonduki kaj asimili la unuagradajn industriajn teknikojn de la mondo por akceli renovighon de la china industrio. Nun la kvartalo jam enkondukis 300 modernajn industriajn programojn el 60 landoj kaj regionoj. Tie fundamente formighis moderna strukturo kun industrioj de mikroelektroniko, moderna telekomunikado, novgeneraciaj familiaj elektraj aparatoj, autopecoj, integrigo de lumado kaj elektrono, biologiaj medikamentoj ktp.

    La kvartalo de neimpostado nomata Waigaoqiao kun areo de 6.4 kvadrataj kilometroj estas la unua granda liber-komerca kvartalo. Ghi celas disvolvi komercojn de prilaboro, servo kaj perado. En la pasintaj monatoj, spite al influo de la financa krizo en Azio, mondfamaj kompanioj, kiaj IBM de Usono, Mitsubishi de Japanio, Hyundai de Koreio, Philips de Nederlando, unu post alia eniris tien por starigi tenejigan au komercan kompanion.

    La kvartalo de altteknologio nomata Zhangjiang fondis la Shanhajan Biologi-medikamentan Sciencan Bazon de Chinio, kiu allogis serion da chinaj kaj alilandaj biologi-medikamentaj institucioj. Tie espereble aperos la "medikamenta valo" de Chinio.

    BONA LOKO POR INVESTANTOJ

    En ekspluatado de Pudong oni unuapashe disvolvis la konstruadon de bazaj instalajhoj, altteknologio, financo kaj komerco, laueble utiligis la merkatojn , kapitalojn, richfontojn en- kaj eksterlandajn. Lau statistiko, la enlanda produktovaloro de Pudong kreskis de 6 miliardoj da juanoj en 1990 al 60.8 miliardoj da juanoj en 1997, t.e. de 8.1% al 18% de tiu de Shanhajo. La rapidega progreso de Pudong akcelis la ekonomion ne nur de Shanhajo, sed ankau de la tuta Chinio.

    Samtempe kun la konstruado de trafikaj, telekomunikaj kaj energiaj instalajhoj, la Administra Komitato de Pudong-distrikto klopodas fari sufiche bonan servon al la investantoj, lau la principo "simpleco, unueco kaj efiko". Ekz., la ekzameno kaj aprobo de investa programo uzas tempon sesone kiom antaue. Plie, aplikado de 70 leghoj kaj statutoj, kiuj celas defendi la justan konkurencon kaj la rajtojn de la investantoj, plifortigis ilian fidon. Nun 100 el la 500 mondfamaj transnaciaj kompanioj investis 150 programojn en Pudong. Tie la bona investa medio kaj kompare pli alta profito de investo instigis la kompaniojn plimultigi investan kapitalon. Ekz., la Kompanio Simens de Germanio sinsekve investis 4 entreprenojn en Pudong.

    La Shanhaja Elektronika Limigita Kompanio Hitachi investita kune de Chinio kaj Japanio farighis modelo en Pudong. Chiuj japanaj investantoj, kiuj tie faris esploradon, vizitis la kompanion. Tio ege okupis la japanan vicchefdirektoron, kiu en la pasintaj jaroj akceptis 200 japanajn esplorajn grupojn. Li diris al siaj samlandanoj: "Sian sukceson en Shanhajo la kompanio Hitachi shuldas al la bona investa medio, alta kvalito de laborantoj kaj granda merkato."

    Pudong jam farighis bona loko por alilandaj investantoj. Lau statistiko, ghis la fino de julio 1998, entreprenistoj de pli ol 60 landoj kaj regionoj investis en Pudong 5250 programojn kun 25.8 miliardoj da usonaj dolaroj kaj 300 mil laborantoj. La "aliland-kapitala ekonomio" en Pudong eniris sian maturighan etapon de profunda ekspluatado kaj chiuflanka disvolvigho.

    Fakte, Pudong estas neoficiala nomo uzata de la shanhajanoj, kiu ghenerale ne trovighas sur mapo. Tamen sur la mondmapo, publikigita de la Mapa Eldonejo Atlas de Usono en 1996, unuafoje trovighas la nomo Pudong. Tio signifas, ke la rolo kaj renomo de Pudong estas vaste konataj de la mondo.