"Ekstermonda persika ghardeno", kie la kampoj estas ebenaj kaj fekundaj, domoj bonordaj, lagoj klaraj, vojoj interkrucighantaj, prosperas verdaj bambuoj kaj morusarboj, viglas dombestoj kaj felichas loghantoj, .estis nur fantazio de granda china literaturisto Tao Yuanming, kiu vivis en 376-427. Sed tia bela ghardeno nun vidighas en Bazu-vilagho de Jiayu-gubernio, Hubei-provinco. La vilaghanoj atribuas la shanghighon de sia loko al vilaghestro Zhou Baosheng.

Pli bela ol la "persika ghardeno"

    La vojoj al Bazu-vilagho estas larghaj kaj ebenaj, ambauflanke de ili prosperas arboj, kiuj shirmas multajn domojn. Survoje ne vidighas rubo nek dombestoj kaj dombirdoj, ofte vidataj sur aliaj vilaghaj vojoj. La etaghdometoj tegitaj per blankaj kaheloj kaj tegmentitaj per rughaj tegoloj bonorde staras che la vojoj.

    Kamparano Zhou Jianhu, kies hejmo trovighas tuj che la vojo, diris al mi, ke li kaj lia edzino laboras en fabriko sub la kompanio (grupo) Tianye. La geedza paro enspezas chiujare 50 mil juanojn. Ili loghas en duetagha domo kun plankareo de 300 kvadrataj metroj. Iliaj du infanoj havas chiu sian propran chambron. En la domo estas legochambro, salono, gimnastejo, banejo kaj kelke da neokupataj chambroj. Ambauflanke de la shtuparo ekster la domo aromas diversaj plantoj. Chie estas pure kaj bonorde. Kokinoj klukas en kagho, porkoj dormas en stalo. Tute ne estas malbona odoro. En la domo instalighas klozeto.

    Mia neatendita vizito neniom surprizis lin, char la simila vizito estas ofta. La edzino de Zhou diris: "Tage, kiam ni eldomighas, ni neniam shlosas la domon, char che ni neniam estis shtelo. 30 alilandaj delegitaroj vizitis nin. Iu brito ne sciis, kial che ni chio estas pura kaj bonorda, kaj loghis che ni du tagojn. Kiam li rimarkis, ke ni metis rubon antau la pordon matene je la 6-a au 7-a horo kaj post la 7-a horo oni kolektis la rubon kaj forportis ghin, li komprenis chion. Li diris kun starigita dika fingro: 'Bone, bonege!'"

    Eldomighinte, mi renkontis Zhou Baosheng. Tiu 48-jara viro alta je 180 cm. estas silentema. Mi demandis: "Mi vidis, ke che vi la loghkondichoj estas bonaj. La domoj kaj arboj, herboj, vojoj kaj kampoj estas harmonie aranghitaj. Chu specialisto projektis chion chi tion por vi?"

    Zhou respondis: "Dankon pro via laudo. Tion projektis mi kaj konstruis mi kune kun miaj kamaradoj."

    "Kiamaniere vi civilizas la vilaghanojn?"

    "Nun la ekonomio disvolvighis kaj la spirita civilizacio nepre devas esti altigita. Por tio ni faras edukon kaj ankau monpunon al tiuj, kiuj ripetis siajn barbarajn kondutojn."

    "Chu la monpunitoj ne koleras kontrau vi?"

    "Vi demandu ilin mem!"

    Poste mi renkontis vilaghanon kaj demandis lin pri tio.

    Ni estas ege dankemaj al nia vilaghestro Zhou. Chiutage antau tagigho li eldomighas kaj revenas hejmen noktomeze. Por nia felicha vivo li laboras senlace. Kial ni koleras kontrau li?"

    Mi ankau volis scii, kiel la najbaroj rigardas la sukceson de Bazu.

    Luo Chuanyong, guberniestro de Jiayu, kiu akompanis nin en la vizito, konigis nin, ke ankau la najbaraj vilaghoj admiras la sukceson de Bazu, char Bazu ne petis monan subvencion de la gubernio, nek ghuis favoran politikon kaj plie ghiaj naturaj kondichoj estas malpli bonaj ol tiuj de la najbaroj. Oni prave diris, ke la sukceso de Bazu estis atingita de Zhou kaj liaj samvilaghanoj per siaj propraj manoj.

Li postenighis kiel vilaghestro

    Antau 1978 la vilaghanoj de Bazu laboris de matene ghis vespere, sed ne liberigis sin el malricho. Tiam la jara pokapa enspezo estis malpli ol 50 juanoj kaj ili iam devis manghi grenon, liveritan de aliaj lokoj, kaj loghis senescepte en adoba domo.

    Tiam Zhou, pli-ol-20-jara ordinara kamparano, ege malkontentis pri siaj vivkondichoj. Li proponis al sia patro, tiama vilaghestro, shanghi la metodon de egalisma distribuo, sed la patro rifuzis. La patro diris: "Vi ne scias, kiel malfacile mi laboras. Se vi estus vilaghestro, vi farus malpli bone ol mi." Zhou Baosheng ekscitighis. Li kontraudiris: "Mi ne samopinias kun vi. Se la samvilaghanoj min konfidas, mi certe faros chiujn sataj en la unua jaro kaj la vilagho havos akumulan kapitalon de 100 mil juanoj en la dua jaro."

    En la sekvanta jaro Zhou vilaghestrighis. Li feliche eklaboris en la favora jaro. Tiam en la china kamparo praktikighis la laukontrakta respondeca laborsistemo kaj Zhou estis forte entuziasmigita. Malgrau kritiko de la patro kaj publika opinio, li distribuis la kampojn al chiuj familioj kaj solene promesis: "Paginte la shtatan grenan imposton, vi povos restigi chion por vi mem."

    La homoj, multe suferintaj de la egalisma distribuo, eklaboris kun ekstreme granda entuziasmo. En la unua jaro la grena produktokvanto de la vilagho superis tiun en la pasinta jaro je 75 tunoj kaj solvighis la problemo pri vestoj kaj manghajhoj. Sub lia gvido kamparanoj plantis abiojn sur 93 hektaroj da tero kaj tearbojn sur 16 hektaroj. Nun la lignokvanto sur tiuj montoj atingis 40 mil kubmetrojn. La montoj farighis neelcherpebla verda banko por la vilagho.

Por bonhavigho

    En 1980 Zhou kaj liaj samvilaghanoj ekfunkciigis butikon, vendejon de manghajhoj kaj fabrikon de glaciajhoj, luinte 3 chambrojn en la distrikto. En la unua jaro ili enspezis 7 mil juanojn kaj unuafoje profitis de tio.

    Poste la vilagho decidis funkciigi bakujon de brikoj kaj tegoloj. Zhou laboris 120 tagojn sur la konstruejo. En tiuj tagoj lia korpopezo reduktighis je 5 kilogramoj, sed per sia shvitado li kaj liaj kamaradoj rikoltis abundon da fruktoj en la jaro de la ekkonstruo.

Distribuo kaj akumulo

    En 1985 la vilaghanoj de Bazu ekvivis bonan vivon. Ili chiuj transloghighis en etaghdomojn kaj ekuzis telefonon. Tiam iuj deziris distribui chion, kion la vilagho havas, dum aliaj kontentighis pri la bonhavigho kaj ne volis strebadi plue. Zhou opiniis, ke la richajho estis kreita de chiuj vilaghanoj, nur racia traktado de la distribuo kaj akumulo utilas al la fundamenaj interesoj de la vilaghanoj. Li do decidis iagrade teni la vivnivelon de la vilaghanoj de Bazu iom pli alta ol tiu de la najbaraj vilaghoj, sed asigni grandan parton de la akumulita kapitalo al ekspansiigo de produktado. Zhou elspezis 2 milionojn da juanoj por konstruo de cisternoj, pump-stacioj kaj kanaloj por altefika agrikulturo kaj ekologia agrikulturo, tiel ke 15 hektaroj da sterilaj kampoj farighis stabile altproduktaj.

    Zhou sciis, ke solaj richfontoj ne garantios felichon de la vilaghanoj por longa tempo. Por rapida kaj longdaura ekonomia disvolvigho oni devas serchi novan elirejon.

De tradicia industrio al tiu de nova altteknologio

    Kiamaniere oni povos sukcesigi la transformighon de tradicia industrio al tiu de nova altteknologio? Post pripensado Zhou decidis starigi novajn altteknologiajn entreprenojn.

    Fama china magnetologo prof. Liu Yesheng vizitis la vilaghon Bazu. Li bone komprenis la deziron de la vilaghanoj pri nova altteknologio kaj fakuloj kaj opiniis, ke la socia etoso de Bazu estas bona kaj la tiea medio por investado estas ideala. Tial 3 tagojn post sia vizito li alkondukis fakulan grupon por fari esploradon al Bazu. Post 4 monatoj ili konstruis la Alojan Fabrikon Yangzi kaj gajnis profiton de 0.5 miliono da juanoj en la sama jaro. Fakulo, kiu iam laboris en Shenzhen, diris, ke la laborefiko de Bazu superis tiun de Shenzhen kaj Zhou estas promesplena entreprenisto."

    En 1996 Zhou informighis, ke la shtato konstruos multe da pontoj stajaj kaj pendantaj, li do decidis fabriki kablojn. Akademiano de la China Akademio de Sciencoj Ge Xiurun sukcesis en esploro de eterne strechebla kablo. Li volis serchi kompanon por industriigi tiun teknikon, sed ne sukcesis. Foje en kunveno por ekspertizo de la scienc-teknikaj fruktoj de la kompanio (grupo) Tianye, li renkontis Zhou kaj ege ghojis pro lia aprobo. Tianye faris teston lau la materialoj, liveritaj de Ge, kaj faris specimenon en mallonga tempo. Ge ege ghojis kaj tuj subskribis kontrakton kun la kompanio pri la kunlaboro.

    Nun la shtala kablo fabrikita de Tianye jam estas uzita por la pontoj en Baishazhou kaj Junshan super Yangzi-rivero. Oni diris, ke nun en Chinio nur du komapnioj kapablas kaj rajtas produkti tiun varon. Ili estas Tianye kaj granda kompanio de Shanhajo.

Por varbi altteknologiajn fakulojn

    Por ke pli da talentuloj laboru en sia kompanio, Zhou sincere traktas ilin kaj donas al ili multajn avantaghojn.

    La pensiono, konstruita de la vilagho por la fakuloj, estas bela kaj komforta, kiel tri-stela hotelo. Tie por chiu fakulo estas disponebla automobilo kaj sufiche da mono por scienc-teknika esplorado. Nun en Tianye laboras pli ol 100 sciencaj kaj teknikaj fakuloj devenintaj de diversaj lokoj de Chinio, el kiuj pli ol 20 estas profesoroj. Tianye kaj la Scienca Fonduso de Chinaj Post-doktoroj kune fondis la Chinan Postdoktoran Altteknologian Ghardenon Tianye kaj havas plurflankajn kunlaborojn kun Qinghua-universitato kaj aliaj scienc-esploraj organizoj.