Shilicun, ordinara vilagho en antauurbo de Zhangzhou de Fujian-provinco, sudorienta Chinio, kulturas chefe rizon. Tamen en 1998 maizo abunde kreskis sur kampoj de tiu vilagho. Kial?

    Char en tiu jaro d-ro Han Gengchang kaj aliaj establis la Teknik-disvolvan Limigitan Kompanion Origin, kiu kulturas maizvarion taugan por subtropika zono. Shilicun-vilagho estas unu el la kvar eksperimentejoj de la kompanio por kultivi, esplori kaj disvastigi novan maizvarion.

    Maizo, unu el la chefaj grenoj en Chinio, estas uzata plejparte en manghajh-prilaborado kaj fisho- kaj bruto-bredado (ghi konsistigas 70% de la nutrajho de fishoj kaj brutoj). Nun la totala areo de maizkampoj estas 20 milionoj da hektaroj plejparte en mezvarma zono, t.e. nordoriento kaj nordokcidento de Chinio, kaj la meza hektara produktokvanto estas 7500 kilogramoj. En suda Chinio en subtropika zono ne bone kreskas maizo de norda Chinio, kaj tie la meza hektara produktokvanto de maizo estas nur 3000-6000 kilogramoj. Sed oni bredas fishojn kaj brutojn chefe en suda Chinio, tio kauzas strukturan mankon de grenoj, t.e. rizo mankas en norda Chinio kaj maizo en la suda.

    Chiujare granda kvanto da maizo transportighis de norda Chinio al la suda, tio altigis la kostojn de prilaborado, fisho- kaj bruto-bredado kaj pezigis la sharghon de trafiko.

    S-ro Han estas juna fakulo pri maizkulturo, kiu revenis post studado en Usono. Gvidate de li, la kompanio enkondukis 1000 tropikajn maizspecimenojn chefe de internacia maiz- kaj tritik-pliboniga centro. Kelkcent specimenoj elektighis kaj kombinighis, kaj provkulturado de iuj el ili sukcesis en Shilicun kaj aliaj eksperimentejoj. La novaj semoj diferencas de tiuj en norda Chinio kaj havas fortan rezistecon kontrau malsano, insektoj, falo de tigoj kaj malfekundeco de tero.

    Internaciaj semo-kompanioj kutime entreprenas selektadon, disvastigon kaj vendon de semoj en unueco. Sed en Chinio scienc-esploraj institutoj zorgas nur pri selektado de semoj kaj semo-kompanioj nur pri semo-komerco. Sub tiu sistemo la scienc-esploraj institutoj dependantaj de shtata subvencio ofte chagrenighas pro manko de monrimedoj por la esplorado kaj iuj semo-kompanioj foje vendas falsajn kaj malbonkvalitajn semojn por gajni pli multe da mono.

    Tuj post sia fondigho la kompanio Origin faras sian entreprenadon lau la internacia sistemo: kredite ricevi monon che banko kaj fari investon, kulturi kaj vendi semojn per si mem. La agado estas laudata de multaj provincoj kaj regionoj en suda Chinio.

    Tiamaniere la kompanio donas esperon al la maizkulturado en suda Chinio.