Pasintsemajne en la teatro "Joakim Vujiĉ" en urbo Kragujevac okazis por Serbia Esperanto-movado - historia okazaĵo: la unua profesia teatra spektaklo en Esperanto.

    Aktoris la skipo internacia (profesia teatra Sceno Shelter): Saŝa Pilipoviĉ (Aleksandar Postnikov), aktoro de kragujevaca teatro, Miĉo Vrhovac (L. L. Zamenhof), esperantisto el Banja Luka (BiH) kaj Ljubica Gaŝpareviĉ (Lidija), aktorino ankaŭ de kragujevac-a teatro "Joakim Vujiĉ". Enscenigisto estis Miliĉ Jovanovic, membro de grupo Shelter Sceno.

    La teatra salonego estis plena. Organizantoj preparis simultanan tradukaĵon por neesperantistoj. La spektaklo estis parto de solena fina vespero de Internacia Festivalo de Malgrandaj Scenoj kiun partoprenis teatroj el Serbio, Britio, Romanio, Usono, Italio kaj Makedonio.

    Al la teatra spektaklo, la unua profesia spektaĵo en Esperanto en Serbio, krom la civitanoj de Kragujevac kaj partoprenantoj de festivalo el aliaj landoj, ĉeestis ankaŭ beogradaj kaj kragujevacaj esperantistoj.

(Dimitrije Janicic)

Redaktoro: Liu Zijia