La suno songxas

de LAUxLUM

En la tria numero de 1995 ni publikigis pecojn el "222 Simplaj Versajxoj por Komencantoj"* verkita de Lauxlum, kio vekis sxaton de niaj legantoj. Por kontentigi la interesatojn, ni aperigis pliajn kiel jene.

La Red.

DANCU! DANCU!

Dancu! Dancu!
Svingu l' krurojn,
lulbalancu
la plezurojn!

Vin turnadu kiel turbo!
Sido, staro estas kulpo!

Dancu pando,
dancu nano,
dancu manto,
dancu rano!

Kantu arde! Dancu arte!
Dancu salte kaj senhalte!

NOBLA HOMO

La bela vorto "Homo"
ja estas nobla nomo.
Fiulo malbonema

egalas al demono.

Por esti homo vera,
restadu vi sincera,
helpema, simpatia,
afabla, nefiera.

MALVARMUMO

Malvarmumo
estas puno
al malzorgo
pri kostumo.

Iuj strebas
nur al belo,
sed neglektas
pri vetero.

Pli ol cxarmo
gravas varmo.
Spitu ne al
frost-alarmo!

LA SUNO SONGxAS

La suno songxas pri la luno;
la luno songxas pri la suno.
la suno kaj la lun' diskutas
Pri la printempo kaj auxtuno.

"Printempo estas la plej bona,
printempe floras cxiuj floroj."
"Auxtuno estas la plej bona,
auxtune fruktas la laboroj!"

Jen gxardenisto intervenas:
"Ja ili ambaux valorplenas.
Printempo florojn al ni portas;
auxtune fruktojn ni rikoltas."