Sensxanceligxaj esperantistoj

--Pri la Huangshi-a Esperanto-Asocio

de XIANG HONG

EN la historio de la cxina Esp-movado Huangshi estis fama urbo. En la fino de la 70-aj jaroj kaj la komenco de la 80-aj jaroj gxi organizis multe da influaj Esp-aktivadoj, kiuj allogis kaj kulturis Esperantajn lernemulojn. Iuj diris, ke la Huangshi-a Esperanto-Asocio (HEA) estas standardo de la cxina Esp-movado. Post kelkjara silento kelkaj bravaj kaj fervoraj esperantistoj de Huangshi lancxis la mirigan aktivadon "Piede transiri la Euxrazian Ponton". Huangshi refoje vekis la atenton de la publiko.

Pri tio la kvara kaj sepa numeroj de "El Popola Cxino" jam raportis. De la 1-a de januaro gxis la 12-a de julio 1999 la piedira grupo laux plano plenumis la cxinan itineron inter Lianyungang de Jiangsu-provinco, la orienta fino de la ponto, kaj Alataw-montpasejo de Xinjiang, tra kiu oni povas eniri la Centran Azion. Ili piediris 4?08 km en 6 provincoj kaj auxtonomaj regionoj kaj intencis ripozi 2 monatojn. Se ne estos problemo, ili atingos en auxgusto 2000 la Centran Oficejon de UEA en Roterdamo post trapaso de Kazahxstano, Rusio, Belorusio, Pollando kaj Germanio. Huangshi-aj esperantistoj nomis la aktivadon "Vojagxo trans Jarcenton".
Se vi bone konas la evoluan historion de la movado de Huangshi kaj ties esperantistojn, vi ne miras pri ilia transjarcenta vojagxo, cxar la vojagxo prezentas la karakteron de la sensxanceligxaj Huangshi-anoj.

FRUKTODONA LABORO

Mi pensas, ke ilia spirito originis eble de la antikveco. Jen kial Huangshi farigxis unu el la luliloj de la bronza kulturo.

Fine de la 70-aj jaroj la okcidenta kulturo kontinue eniris en Cxinion kaj cxinoj havis diversajn lernosxancojn, interalie lerni fremdajn lingvojn farigxis furoro. Tial multaj cxinoj ekkonis Esperanton. Kun obstina karaktero Huangshi-anoj fervore lernis Esperanton, kio influis la tutan landon. Tiam en Huangshi trovigxis mil lernantoj de Esperanto kaj en aliaj urboj estis ankaux lernantoj de gxia koresponda kurso, inter kiuj estis elstara cxina junulino Zhang Haidi, kriplulino de Shandong-provinco, scipovanta kelkajn fremdajn lingvojn. HEA fondigxis en aprilo 1981. Poste gxi sin preparis por inviti la Cxinan Kongreson de Esperanto, kun mil aligxintoj. Sed bedauxrinde, gxi ne sukcesis pro iaj kauxzoj. Fine en julio de la sama jaro gxi okazigis simpozion, kiun partoprenis pli ol 200 personoj el diversaj provincoj. Menciante la simpozion, esperantistoj de Huangshi nomas gxin "malgranda UK". Post la simpozio ili redaktis kaj eldonis "Adresaron", kiu enhavas la adresojn de 1 054 aligxintoj de la abortinta kongreso supre menciita. Dume ili eldonis ankaux "Jarkunveno de la Hubei-a Esperanto- Asocio (prepara) kaj simpozio de 1981". La koncernatoj s-roj Hu Guozhu kaj Yuan Zegao memoris, ke en redaktado kaj eldonado de la du libroj ili renkontis multe da malfacilajxoj. Sed la du libroj jam farigxis historiaj materialoj utilaj por la Esp-movado de Cxinio.

Novembron de 1984, HEA kun 8 Esperantaj organizoj okazigis la Cxinan Esperantan Simpozion pri Scienco kaj Tekniko, kiun partoprenis 127 esperantistoj, sin okupantaj pri scienc-teknika laboro, el 25 provincoj kaj municipoj. Tiam Huangshi estis fama cxina urbo por esperantistoj, ke samideanoj el pli ol 20 landoj vizitis gxin. En 1985 s-ro Zhang Qicheng, tiama gxenerala sekretario de la Cxina Esperanto-Ligo, vizitis Huangshi kaj kun ekscitigxo diris: "Huangshi estas malgranda, tamen granda por esperantistoj."

REBRILOS LA MOVADO

En la lastaj jaroj la cxina Esp-movado ne tiom viglis pro tio, ke oni devis pli prizorgi siajn vivkondicxojn influitajn de la reformado de la sistemo de bonstatiga domdistribuo kaj reformado de kuracaj pagoj kaj salajra sistemo. Ankaux Huangshi ne estis escepto. Sed ankoraux ekzistas iuj fervoraj esperantistoj, kiuj ne forgesis lerni, disvastigi kaj apliki Esperanton. En 1996 s-ro Wei Guangliang farigxis nova gxenerala sekretario de HEA. Li rigardas disvastigon de Esperanto kiel batalon en sia vivo. Fronte al la malfavora situacio, li ellaboris orientilon "firme teni la terenon, repreni la perditan teron kaj disvastigi la spacon". Li alvokis, ke esperantistoj levu sian lingvan nivelon kaj sercxu realan starpunkton por Esperanto. En la lastaj du jaroj la asocio renormaligis monatan kunvenon kaj semajnan aktivadon de Esp-lernado en la kultura palaco. Gxi eldonis denove sian revuon "Nova Floro", venkinte diversajn malfacilajxojn. Pli ol 100 Huangshi-aj esperantistoj farigxis denove gxiaj legantoj. Por disvastigi Esperanton en pli multajn lokojn Huangshi-aj esperantistoj lancxis la aktivadon "Piede transiri la Euxrazian Ponton". Inter la piedirantoj estas 4 Huangshi-aj esperantistoj kaj 2 el alia urbo. Ili transpasis Gobion kaj altebenajxon kaj spertis sablosxtormon kaj varmegon por provoki sian fiziologian limon. Ilia sensxanceligxo kortusxis la homojn, kiuj priatentis ilin. Dum la vojo ili prelegis por propagandi Esperanton kaj kontaktigxis kun alilokaj esperantistoj, por ke ili vidu la koheran forton de Esperanto.

Dank' al subteno de la bravaj esperantistoj, Wei Guangliang kredas, ke certe rebrilos la Esperanta movado de Huangshi.