En la speciala zono por servoj al entreprenoj irantaj eksterlanden ĉe la Ĉina Internacia Foiro por Komerco de Servoj (CIFTIS) 2026 en Pekino, oni povas vidi tre malsamajn servojn. Unu kompanio helpas ĉinajn entreprenojn partopreni ekspoziciojn en Germanio, Italio kaj aliaj landoj. Alia ofertas servojn pri registrado de kompanioj, kontado, revizio kaj impostoj en Hongkongo. Ne malproksime, kompanio pri intelekta proprieto helpas ĉinajn teknologiojn trovi partnerojn eksterlande. KPMG parolas pri strategio, plenumo de reguloj kaj loka adaptiĝo. La servoj estas malsamaj, sed ili havas ion komunan: iliaj klientoj estas ĉinaj entreprenoj, kiuj iras al internaciaj merkatoj.

La zono "Eliri al la Granda Maro" en CIFTIS

Pli da ĉinaj entreprenoj eksterlande

Laŭ la plej novaj datumoj de la Ministerio pri Komerco de la Ĉina Popola Respubliko (MOFCOM) kaj la Ŝtata Administracio pri Fremdlanda Valuto (SAFE), la rekta investado de Ĉinio eksterlande atingis 684.51 miliardojn da juanoj en la unuaj sep monatoj de 2026, je 2.8% pli multe ol en la sama periodo de la antaŭa jaro. La internacia ĉeesto de ĉinaj entreprenoj jam estas vasta. Laŭ la Nacinivela Ampleksa Servoplatformo por Eksterlandaj Aktivecoj de MOFCOM, fine de 2025 ekzistis ĉirkaŭ 58 000 ĉinaj entreprenoj eksterlande.

Sed malantaŭ tiuj nombroj troviĝas pli grava ŝanĝo. Por multaj entreprenoj, iri eksterlanden ne plu signifas simple produkti varojn en Ĉinio kaj vendi ilin al eksterlandaj klientoj. Ili devas trovi merkatojn, konstrui markojn kaj protekti siajn teknologiojn. Ili devas registri kompaniojn, administri impostojn kaj lerni kiel funkciigi entreprenon en alia komerca medio. Ĉiu paŝo kreas bezonon de malsamaj servoj.

Kiel eniri novan merkaton?

Por entrepreno, kiu ankoraŭ ne havas sperton en Eŭropo aŭ Latin-Ameriko, internacia ekspozicio povas esti unu el la unuaj manieroj testi novan merkaton. Kimberly Yan, altranga fakulo pri merkatado kaj komunikado ĉe la kompanio Hannover Milano Fairs Shanghai Ltd., diris, ke unu el la taskoj de la kompanio estas helpi ĉinajn entreprenojn partopreni ekspoziciojn eksterlande. La merkatoj inkluzivas Germanion kaj Italion, sed ankaŭ Turkion, Meksikon, Aŭstralion, Singapuron kaj Saud-Arabion.

La bezonoj varias laŭ industrio. En Germanio multaj ĉinaj partoprenantoj venas el industriaj sektoroj. Ili produktas industriajn komponantojn, robotojn aŭ teknologiojn rilatajn al artefarita intelekto. En Italio pli multaj venas el kampoj kiel hotelaj ekipaĵoj, modo, juvelaĵoj kaj akcesoraĵoj. Sed partopreni internacian ekspozicion ne signifas nur lui budon kaj serĉi mendojn. Laŭ Yan, por entrepreno ankoraŭ malmulte konata en iu merkato, ekspozicio povas helpi al lokaj klientoj ekkoni ĝian markon. Ĝi ankaŭ estas loko por observi la merkaton, renkonti aliajn kompaniojn en la sama industrio kaj vidi, en kiu direkto evoluas novaj teknologioj.

Por grandaj ĉinaj entreprenoj jam aktivaj eksterlande, la celo povas esti alia. Yan menciis pri la kompanioj Zoomlion kaj Shanghai Electric. Por tiaj kompanioj, internacia ekspozicio ankaŭ estas loko por konservi la videblecon de la marko kaj renkonti ekzistantajn klientojn, provizantojn kaj partnerojn. Ankaŭ la preparado ne ĉiam estas simpla. Oni devas aranĝi la budon, transporti produktojn kaj komuniki kun la organizantoj. Estas ankaŭ laboro surloke, vojaĝoj kaj vizoj. Tial ekspoziciaj servoj povas fariĝi parto de la vojo al nova merkato. Sed trovi klientojn estas nur la komenco.

Registri kompanion ne sufiĉas

Kiam entrepreno decidas resti pli longe en eksterlanda merkato, la demandoj rapide ŝanĝiĝas. Kie registri kompanion? Kiu subskribos la kontraktojn? Kiu portos la riskojn? Kiel fluos la mono? Kie oni pagos impostojn? Tiuj estas inter la demandoj, kiujn renkontas Carina, komerca konsilisto ĉe la kompanio CONPAK Management Consultants Limited, kiam ŝi laboras kun ĉinaj entreprenoj.

CONPAK funkcias en Hongkongo jam de 28 jaroj. Ĝiaj servoj inkludas registradon de kompanioj, kontadon, revizion kaj impostan konsiladon. Sed kiam la internaciaj agadoj de klientoj fariĝis pli kompleksaj, ankaŭ la bezonataj servoj ŝanĝiĝas. Carina emfazis unu gravan punkton: registri kompanion eksterlande ne signifas, ke entrepreno jam finis sian internaciiĝon. Por entrepreno aktiva en pluraj merkatoj, la grava demando ne estas nur kie registri kompanion. La tuta strukturo devas kongrui kun la reala komerca agado. Kiu respondecas pri vendado? Kiu portas la riskojn? Kiel estas organizita la monfluo? La bezono de tiaj servoj aperas sur fono de ĉiam pli vasta internacia invest-reto. Laŭ MOFCOM kaj SAFE, nur dum la unuaj sep monatoj de 2026 ĉinaj investantoj faris nefinancajn rektajn investojn en entreprenoj de 148 landoj kaj regionoj.

Ankaŭ teknologio bezonas vojon al la merkato

Ne ĉiu internacia komerca vojo komenciĝas per preta produkto. Marco Li, administra direktoro de la kompanio Propagate Intellectual Property Limited, rakontis pri profesoro de Sun Jatsen-Universitato en Kantono. La profesoro evoluigis maldikan folion kun karbonaj nanotuboj, kiu povas esti varmigita ĝis ĉirkaŭ 300 celsiaj gradoj. La kompanio de Li helpis pri protektado de la intelekta proprieto kaj pri serĉado de ebloj por enkonduki la teknologion en eksterlandan merkaton.

Laŭ Li, komence de ĉi tiu jaro lia kompanio kontaktigis la projekton kun malajzia listigita kompanio en la naft-industrio. La teknologio poste estis uzata en aplikaĵo por varmigi naftoduktojn. La celo estas redukti la riskon de blokado dum transportado de nafto. Poste la tri flankoj — la teamo de la profesoro, la malajzia kompanio kaj la servoprovizanto — establis komunan entreprenon en Hongkongo. Ili nun laboras por plu komercigi la aplikon.

La kazo montras, ke servoj pri intelekta proprieto ne nepre finiĝas ĉe registrado de patento aŭ varmarko. En iuj kazoj, tia servo povas ligi teknologion kun merkato. Ĝi helpas protekti inventon, trovi partneron kaj transformi esplorrezulton en komercan agadon. Tia bezono kreskas kun la internacia komerco de sciointensaj servoj. Laŭ MOFCOM, la eksportado de sciointensaj servoj kreskis je 12.2% en la unuaj sep monatoj de 2026. Aparte rapide kreskis enspezoj el uzrajtoj de intelekta proprieto: je 42.1%.

Pli profunda ĉeesto en eksterlandaj merkatoj

La tri rakontoj estas malsamaj, sed ili montras partojn de la sama ŝanĝo. KPMG priskribas tiun ŝanĝon en raporto pri la tutmondiĝo de ĉinaj entreprenoj, publikigita dum la ĉi-jara foiro. La raporto dividas la procezon en tri etapojn. En la unua etapo la ĉefa agado estas komerco kaj eksportado. Esplorado, produktado kaj plej multaj aliaj agadoj restas en Ĉinio, dum la produktoj estas vendataj eksterlande. En la dua etapo entreprenoj komencas konstrui tutmondan reton. Ili investas eksterlande kaj establas kapablojn pri produktado, vendado aŭ esplorado en aliaj merkatoj. En la tria etapo la loka adaptiĝo fariĝas pli profunda. Esplorado, produktado, vendado kaj funkciigado estas plie integritaj en la eksterlanda merkato. La kompanio ne plu simple eksportas produktojn el Ĉinio. KPMG ankaŭ priskribas tri formojn, kiuj povas ekzisti samtempe: internaciiĝo de produktoj, internaciiĝo de provizoĉenoj kaj internaciiĝo de komercaj modeloj. Grava parto de la ĉina investado eksterlande iras al landoj partoprenantaj en la iniciato "La Zono kaj Vojo". Laŭ MOFCOM, dum la unuaj sep monatoj de 2026 ĉinaj entreprenoj faris nefinancajn rektajn investojn de 151.99 miliardoj da juanoj en tiuj landoj.

Ju pli kompleksa fariĝas la eksterlanda agado de entrepreno, des pli malfacile estas fari ĉion sola. Novaj demandoj aperas pri juro, dungitoj, provizoĉenoj, datumoj, impostoj kaj administrado. Tiel la internaciiĝo de ĉinaj entreprenoj mem kreas novan bezonon de profesiaj servoj. La ĉina komerco de servoj daŭre kreskas. Laŭ MOFCOM, la eksportado de servoj kreskis je 17.1% en la unuaj sep monatoj de 2026. La kompanioj ĉe la ĉi-jara foiro montras malpli videblan flankon de la internaciiĝo de ĉinaj entreprenoj.

Kiam ĉinaj entreprenoj iras eksterlanden, ne nur iliaj produktoj transiras landlimojn. Ili bezonas ankaŭ servojn por trovi merkatojn, protekti teknologiojn kaj funkcii en novaj komercaj medioj. Ju pli profunde ili eniras internaciajn merkatojn, des pli gravaj fariĝas la servoj, kiuj akompanas ilin.

Verkis: Bui Hai Mung

Facebook: Ĉina Fokuso / China Focus - Esperanto

Twitter: El Popola Chinio

WeChat: Skani la du-dimensian kodon por legi EPĈ en WeChat