Ĉe la Ĉina Internacia Importa Ekspozocio (ĈIIE) de ĉi tiu jaro, s-ro Zhu Peijing, ĝenerala direktoro de la sekcio pri strategia komerco kaj direktoro pri novkomerca disvolvado de la grupo Mitsubishi Electric, dividis siajn spertojn pri la ok sinsekvaj jaroj de partopreno en ĈIIE kaj klarigis la disvolvan strategion de la grupo fronte al la ĉiam pli akra merkata konkurenco en Ĉinio.

Laŭ s-ro Zhu, Mitsubishi Electric ĉeestis ĈIIE ekde la unua fojo, kaj ĝis nun ĝi restas la sola ekspozicio en Ĉinio, en kiu la grupo partoprenas ĉiujare. La kialo, laŭ li, estas ke "ĈIIE estas la plej ampleksa kaj valora platformo por eksterlandaj entreprenoj, kie kuniĝas ne nur konsumantoj, sed ankaŭ registaraj oficistoj, centraj kaj lokaj ŝtataj entreprenoj, kaj potencialaj strategiaj partneroj."

Li klarigis, ke la ekspoziciejo de Mitsubishi Electric ĉiam kunigas filiojn de diversaj kampoj, kiel liftoj, klimatiziloj kaj industria aŭtomatigo, por montri la sintezan kapablon kaj la altnivelan teknologion de la grupo. "Ĝuste ĉe ĈIIE okazis multaj ceremonioj de strategiaj kunlaboraj interkonsentoj kaj lanĉoj de novaj produktoj, kio formis markan bildon, kiun malmultaj aliaj ekspozicioj povas egali," li diris.

En la ekspozicia zono pri industria elektra ekipaĵo, Mitsubishi Electric staras flanke de mondfamaj markoj kiel Omron kaj Siemens, kio kreas viglan pejzaĝon de interŝanĝo kaj konkurenco inter la plej elstaraj markoj de la mondo.

104 jaroj da evoluo -- 47 jaroj kune kun Ĉinio

Fondita en 1921, Mitsubishi Electric eniris la ĉinan merkaton en 1978 per kunlabora projekto kun la grupo Baosteel, kaj poste starigis komunan entreprenon kun Shanghai Electric en la kampoj de liftoj kaj klimatiziloj.

Nun ĉirkaŭ 80% de la ĉefaj produktoj de Mitsubishi Electric Japanio estas fabrikataj aŭ muntataj en Ĉinio, kaj la enspezo el la ĉina merkato konsistigas pli ol 10% de la tutmonda enspezo de la grupo.

Malgraŭ la ĉiam pli akra konkurenca medio, s-ro Zhu emfazas, ke Ĉinio restas unu el la plej strategiaj merkatoj por Mitsubishi Electric. "Ni kredas, ke nur montrante nian plenan teknologian forton kaj longdaŭran engaĝiĝon, ni povos resti stabilaj en ĉi tiu merkato."

Teknologio kaj novigo -- ŝlosilo al gvidado en la epoko de artefarita intelekto

Ĉe ĈIIE de ĉi tiu jaro, Mitsubishi Electric prezentis serion da pioniraj produktoj, inkluzive de AI-integrita ekstera-inspekta roboto, evoluigita kun la kompanio Humanoid Robotics Luming.

La roboto estas ekipita per profund-lerna algoritmo, kapabla memstare lerni el specimenoj de produktaj difektoj kaj detekti ekstere videblajn misojn en la produktada linio, tiel reduktante laborajn kostojn kaj plibonigante la efikecon de kvalita kontrolo.

"La produkto ankoraŭ troviĝas en la optimumiga fazo, sed kun la rapida evoluo de artefarita intelekto kaj homformaj robotoj, mi kredas, ke tiaj aplikoj baldaŭ estos vaste uzataj," diris s-ro Zhu.

Rapida reagado -- decida faktoro en la ĉina merkato

Laŭ li, ĉinaj produktaj entreprenoj disvolviĝas rapide, teknologioj konstante progresas, kaj ili jam atingis la nivelon de eksterlandaj konkurantoj. En tia konkurenca medio, la ĉefa ŝlosilo de sukceso estas lokalizo kaj kapablo rapide respondi al merkataj bezonoj.

Por respondi al ĉi tiu postulo, Mitsubishi Electric fondis la kompanion Mitsubishi Electric Intelligent Manufacturing Technology Co., Ltd. en Suzhou la 30-an de junio 2025, por plifortigi siajn esplorojn kaj surlokajn servokapablojn en la kampo de industria aŭtomatigo.

Fido je dinamika kaj malferma ekonomio de Ĉinio

Pri la ekonomia perspektivo, s-ro Zhu diris: "Dum la lastaj kvin aŭ ses jaroj, ĉinaj produktaj entreprenoj faris grandegajn progresojn. Kvankam la duonkondukta industrio estas influita de usonaj tarif-politikoj, tio tamen instigis internan novigon kaj teknologian memstarecon."

Li atentigis, ke eksterlandaj kompanioj devas plifortigi siajn investojn, intensigi esploradon kaj doni pli da aŭtonomeco al siaj ĉinaj filioj, alie ili rapide perdos konkurencan avantaĝon. Laŭ li, la ĉina komerca medio restas dinamika, malferma kaj favoras kreemon, kio evidentiĝas per la eksploda disvolviĝo de novaj kampoj kiel homformaj robotoj kaj la malalt-altituda ekonomio, simila al la kresko de la nova energia veturila industrio antaŭ kelkaj jaroj.

ĈIIE -- platformo kiu malfermas ŝancojn por ĉiuj entreprenoj

Fine, s-ro Zhu emfazis: "ĈIIE estas la plej altnivela nacia platformo de Ĉinio, kie kuniĝas la registaro, ŝtataj entreprenoj kaj tutmondaj kompanioj. Partopreno en ĈIIE ne nur estas ŝanco por reklami produktojn kaj markojn, sed ankaŭ strategia ponto por eksterlandaj entreprenoj plilarĝigi kunlaborojn kaj firmigi sian pozicion en la ĉina merkato."

Por Mitsubishi Electric, la ok-jara akompano kun ĈIIE ne estas nur vojaĝo de teknologia ekspozicio, sed ankaŭ atesto pri la longdaŭra engaĝiĝo de la japana grupo al la plej rapide kreskanta ekonomio en la mondo.

Raportita de Bui Hai Mung

Facebook: Ĉina Fokuso / China Focus - Esperanto

Twitter: El Popola Chinio

WeChat: Skani la du-dimensian kodon por legi EPĈ en WeChat