Mi neniam forgesos miajn unuajn spertojn pri reta aĉetado en Ĉinio. Kiam mi ĵus alvenis kaj komencis uzi la retajn aĉetaplikaĵojn ĉi tie, mi mendis T-ĉemizon per Pinduoduo je la 22-a horo kontraŭ nur 25 juanoj (ĉirkaŭ 3.5 USD) kaj mirinde, ĝi estis liverita al mia pordo en la sekva tago. En tiu sama nokto, kiam mi sentis min malsata, mi provis mendi manĝaĵon per Meituan (24-hora manĝmenda aplikaĵo). Nekredeble, post malpli ol 30 minutoj la liveristo jam atingis mian pordon. Tiuj spertoj, ekde "nokta livero" ĝis "morgaŭa livero", ne estas esceptoj sed ĉiutaga normo. Ili mirigis min kaj igis min demandi: Kiel eblas tion fari je preskaŭ neimagebla kosto?

Mia scivolemo kondukis min al la ciferoj de la tuta industrio. Laŭ la Nacia Raporto pri la Loĝistika Agado 2024, la tuta socia loĝistik-valoro de Ĉinio atingis 360.6 duilionojn da juanoj en 2024, dum la totala enspezo de la sektoro estis 13.8 duilionoj da juanoj. Eĉ pli rimarkinde, laŭ la prognozo de la "Ĉina Federacio de Loĝistiko kaj Aĉetado", la merkata skalo superos 14 duilionojn da juanoj en 2025, tenante la unuan lokon en la mondo dum dek sinsekvaj jaroj.

Pri rapideco, kun pli ol 200 miliardoj da pakaĵoj liverataj ĉiujare, la sistemo ne nur estas grandega, sed ankaŭ eksterordinare rapida. Kompare, en okcidentaj landoj livero en la sama tago ofte estas luksnivela servo kun alta kosto, dum en Ĉinio ĝi fariĝis normala praktiko je preskaŭ nula kroma prezo. Tiu efikeca diferenco klare videblas en la mezuro inter loĝistikaj kostoj kaj MEP, kiu daŭre pliboniĝis, atingante nur 14.1% en 2024.

Impeta rapideco kaj neimagebla kosto

Pri tempo de livero, servoj de sama-taga livero jam fariĝis normo en grandaj urboj, dum sekva-taga livero estas baza opcio kaj preskaŭ senpage. Kompare kun Usono, livero en du tagoj estas konsiderata rapida kaj ofte postulas abonpagon (ekz. Amazon Prime). En Eŭropo, atendado de 3-5 labortagoj estas normala. Sed en Ĉinio rapideco mezuriĝas laŭ horoj. La akra konkurenco inter gigantaj kompanioj kiel JD.com kaj Alibaba transformis rapidecon en vivnecesa ilo, puŝante la tutan industrion antaŭen je ritmo, kiun la mondo ankoraŭ ne spertis.

Eĉ pli ŝoka estas la kosto de ĉi tiuj fulmrapidaj servoj. En Guangdong -- la ĉefa produktcentro -- la sendo de la unua kilogramo kostas nur ĉirkaŭ 8 juanojn (ĉirkaŭ 1.12 USD), kaj ĉirkaŭ 2 juanojn (0.25 USD) por ĉiu sekva kilogramo. En grandaj urboj kiel Pekino, Ŝanhajo kaj Tianjin, la unua kilogramo kostas ĉirkaŭ 12 juanojn (1.67 USD), kaj la sekvaj po 6 juanoj (0.84 USD). En Usono aŭ Eŭropo similaj sendokostoj povas esti 10-20 fojojn pli altaj. La kombino de grandega skalo, radikala aŭtomatigo kaj draste konkurenca merkato kreis modelon, en kiu alta kvalito kaj ekstrema malaltkosto kunekzistas harmonie.

Do, kio estas la sekreto malantaŭ tiu nekredebla kombino de mirrapideco kaj malaltkosto? Ĝi kuŝas en la kombino de kvar strategiaj faktoroj.

Faktoro 1: Skalo kaj denseco

La unua kernoforto de la ĉina loĝistiko devenas de la grandega hejma merkato, kun kiu malmultaj landoj povas kompari. Ĉinio ludas duoblan rolon: Ĝi estas samtempe "la laborejo de la mondo" kaj konsummerkato kun pli ol 1.4 miliardoj da loĝantoj.

En 2024 la tuta loĝistik-valoro nur por industriaj produktoj atingis 318.4 duilionojn da juanoj -- cifero reflektanta la senĉesan fluon de varoj. Tiu grandega volumo generas superan ekonomion de skalo: Ĉiuj fiksaj kostoj -- de funkciado de grandegaj distribu-centroj ĝis bontenado de transport-veturiloj kaj investado en teknologia infrastrukturo -- estas disdonitaj inter cent milionoj da pakaĵoj jare. Rezulte, la marĝena kosto por pritrakti unu pakaĵon fariĝis ekstreme malalta. Krome, la alta loĝdenseco kaj urbaniza rapideco koncentras postulon en specifaj areoj, ebligante al distribuaj centroj servi dek milojn da hejmoj en radiuso de kelkaj kilometroj. Tio optimumigas liver-itinerojn kaj signife reduktas la kostojn de la "lasta kilometro" -- tradicie la plej multekosta parto de ĉiu loĝistik-procezo.

Faktoro 2: La teknologia kaj aŭtomatiga revolucio

Tamen, eĉ la plej granda skalo fariĝus kaosa sen delikata cerbo por regi ĝin. Jen kie la teknologia revolucio eksplodis. La inteligentaj magazenoj -- aŭ tiel nomataj "senhomaj stokejoj" -- de gigantaj kompanioj kiel JD.com kaj Cainiao estas la plej klaraj ekzemploj. Tie, miloj da robotoj moviĝas kun alta ordo por ricevi mendojn, serĉi varojn kaj transporti ilin al la pakaj stacioj, funkciantaj 24/7 kun preskaŭ absoluta precizeco.

La vera forto kuŝas en la fundamento de artefarita intelekto (AI) kaj grandaj datumaroj (Big Data). La AI-algoritmoj ne nur mastrumas la fluon de varoj ene de la magazeno, sed ankaŭ analizas konsumhistorion kaj tendencojn por antaŭdiri postulon. Ili povas prognozi, kiuj varoj estos plej mendataj en specifaj regionoj, tiel ke la sistemoj antaŭaranĝas kaj stokas ilin en magazenoj plej proksimaj al konsumantoj -- eĉ antaŭ ol la mendoj estas faritaj. Tio transformas la tutan procezon de pasiva reago al aktiva antaŭvidado, mallongigante la liverotempon ĝis la minimumo ebla.

Faktoro 3: La infrastruktura ekosistemo

Teknologio kaj varoj bezonas ekstreme efikan transportan reton por flui -- kaj Ĉinio investis en tio senhezite dum jardekoj. La lando posedas la plej longan aŭtovojreton en la mondo, kies totala longeco atingis pli ol 191 mil kilometrojn fine de 2024, formante dense konektitan reton inter ĉiuj metropoloj, urbetoj kaj vilaĝoj. La alt-rapida fervoja sistemo, kun pli ol 48 000 kilometroj da trakoj, ne nur servas pasaĝerojn, sed ankaŭ ludas ĉiam pli gravan rolon en transporto de malpezaj kaj altvaloraj varoj inter grandaj urboj.

Je la tutmonda nivelo, Ĉinio ankaŭ dominas. Ĝi posedas 7 el la 10 plej okupataj kontenerhavenoj en la mondo, garantiante glatan fluon de eksporto kaj importo. La kombino inter ĉi tiuj diversaj infrastrukturoj kreas kompletan ekosistemon, kiu ebligas al pakaĵo vojaĝi de fabriko en Guangdong ĝis la manoj de konsumanto en Xinjiang rapide kaj seninterrompe.

Tutmonda loĝistiko

Per la iniciato "La Zono kaj Vojo", Ĉinio eksportas sian propran modelon kaj normojn de loĝistika administrado tutmonde. La interkontinentaj fervojlinioj, kiel la itinero inter Ĉinio kaj Eŭropo, jam ligas 229 urbojn en Eŭropo kaj pli ol 100 en Azio, mallongigante transporttempon de Ĉinio al Eŭropo de 45 tagoj mare ĝis nur 15-18 tagoj. Ĉinaj aviadkompanioj posedas 44% de la tutmonda merkato por internacia kargotransporto, dum la tiel nomata "aersilkvojo" jam etendiĝis al 83 landoj kaj 213 eksterlandaj urboj. La ĉina komerca ŝipfloto, la plej granda en la mondo, establis regulajn itinerojn al pli ol 100 landoj kaj regionoj, kaj la nivelo de mara konektado de Ĉinio restas la plej alta en la mondo dum multaj jaroj. Investoj en havenoj de Eŭropo ĝis Afriko certigas tutmondan ĉeeston kaj kontrolon super strategiaj transportvojoj. Alivorte, se la enlanda loĝistik-reto estas la "rapida livero" inter provincoj, la iniciato prezentas ĝian tutmondan version de la sama servo.

Faktoro 4: Konkurenc-medio kaj integrita modelo

La fina faktoro, kiu funkcias kiel katalizilo, estas la senkompata konkurenco kaj la novigaj komerc-modeloj. La rivaleco inter gigantaj kompanioj kiel Alibaba, JD.com kaj Pinduoduo transformis liverrapidecon kaj prezon en la ĉefajn batalkampojn. Por akiri kaj reteni klientojn, tiuj kompanioj estas devigitaj senĉese novigi kaj optimumigi sian efikecon -- tiel pelante la tutan industrion antaŭen.

Tion subtenas la integrita modelo, laŭ kiu la retkomercaj kompanioj ne nur vendas produktojn, sed ankaŭ posedas kaj regas preskaŭ la tutan sian propran loĝistikreton -- de magazenoj kaj transport-veturiloj ĝis la fina liver-teamo. Tiu modelo ebligas al ili strikte kontroli ĉiun fazon, certigi altan sinkronigon kaj forigi mezan koston, liverante al finuzantoj sperton de "superrapida kaj supermalmultekosta" servo.

Nova tutmonda normo

Mia sperto pri 30-minuta livero ne estas simpla komforto -- ĝi estas perfekta kombino de skalo, teknologio, infrastrukturo kaj konkurenco. La ĉina loĝistik-industrio transpasas la limojn de ordinara transportado por fariĝi forto, kiu restrukturos la tutmondan ekonomion. La "ĉina rapideco" kaj "ĉina kosto", kiujn mi atestis ne plu estas nura enlanda rakonto, sed fariĝas nova tutmonda normo, devigante ĉiujn landojn kaj kompaniojn revidi kaj redifini sin mem en la mondo, kie la limo inter "neebla" kaj "normala" ne plu ekzistos.

Verkis Bui Hai Mung

Facebook: Ĉina Fokuso / China Focus - Esperanto

Twitter: El Popola Chinio

WeChat: Skani la du-dimensian kodon por legi EPĈ en WeChat