de Gayane Umerova*

Konsiderante, ke tutmonda necerteco markas ĉi tiun epokon, la bezono de vera interkultura dialogo kaj interhoma interŝanĝo neniam estis pli granda ol nun. Uzbekio, strategie situanta sur la Silka Vojo, denove aperas kiel renkontiĝejo por ideoj, artistoj kaj civilizacioj. Kiel prezidanto de la Uzbeka Arta kaj Kultura Disvolva Fonduso, mi mem vidis la eksterordinaran povon, kiu liberiĝas, kiam landoj investas en kultura diplomatio, heredaĵa konservado kaj novigado. Ĉi tio estas precipe videbla en la fruktodona partnereco de Uzbekio kaj Ĉinio, kaj la kreskanta dialogo, kiun la du landoj forĝas kun la mondo.

La aliro de Uzbekio baziĝas sur la kredo, ke kulturo estas ne nur ponto inter popoloj, sed ankaŭ katalizilo por ekonomia disvolviĝo kaj socia progreso. Kun pli ol 60 procentoj de la loĝantaro de Uzbekio aĝanta sub 30 jaroj, kreskigi ekosistemon per kiu junaj uzbekoj povu prosperi kiel artistoj, kuratoroj kaj kulturaj gvidantoj, estas la kerno de nia misio. La nombro de studentoj en altlernejoj de Uzbekio triobliĝis ekde 2017, kun preskaŭ 1.43 milionoj da studentoj nun en universitatoj. Ni volas kontribui por pliigi tiun nombron.

Nia kultura partnereco kun Ĉinio estas aparte grava, ĉar ĝi elstarigas la daŭran spiriton de la Silka Vojo. Lastatempe ni vidis kunlaborojn en kultura heredaĵo kaj arkeologio sub la kadro de la iniciato "La Zono kaj Vojo" ĉe la Palaca Muzeo (Malpermesita Urbo) en Pekino kaj "Kolora Azio: Ekspozicio de Aziaj Kostumoj" en Hangzhou de Ĉinio, prezentante kolekton de 140 pecoj kaj aroj da vestoj reprezentantaj 27 aziajn landojn kaj regionojn. Ni ankaŭ organizis la uzbekan baleton Lazgi kun la Nacia Pekina Operkompanio.

Per komunaj ekspozicioj, akademiaj partnerecoj kaj interŝanĝo de plej bonaj praktikoj en heredaĵa administrado, la du landoj estas en bona pozicio por formi pli inkluzivan kaj kreivan estontecon.

*Prezidanto de la Uzbekia Arta kaj Kultura Disvolva Fonduso

Redaktoro: Xie Ruifeng

Facebook: Ĉina Fokuso / China Focus - Esperanto

Twitter: El Popola Chinio

WeChat: Skani la du-dimensian kodon por legi EPĈ en WeChat