de Massoud Amin*

Levilforto sen vojmapo estas premo sen direkto. Kiam Usono antaŭeniras kun sia detrua politiko pri Ĉinio, merkatoj velkas, bretoj maldensiĝas, kaj premo kreskas el interne de la estraranoj de la plej grandaj usonaj kompanioj. Pli ol 10 duilionoj da usonaj dolaroj estis forviŝitaj de la borso, kiam Usono pliintensigis sian politikon. Podetalistoj, fabrikantoj kaj gvidantoj de provizoĉenoj -- de aŭtomobiloj ĝis teknologioj -- avertis, ke kritika inventaro malrapidiĝas. La fondinto de Tesla kaj SpaceX Elon Musk kaj aliaj iam-aliancitaj ĉefoficistoj jam sonigis alarmojn.

Ene de la Blanka Domo estas signoj de realĝustigo. Amaskomunikilaj raportoj konfirmas, ke la usonaj administrantoj reduktis tarifojn, malaltigante la nivelojn de 145% al 30%.

Anstataŭ publika provoko, Ĉinio agis strategie: Prezidanto Xi Jinping pasigis la pasintan monaton turnante al Sud-orienta Azio, profundigante ligojn kun Kamboĝo, Vjetnamio kaj aliaj landoj, samtempe metante la fundamenton por plivastigitaj ekonomiaj partnerecoj en Eŭropo. Ili ne estas simbolaj gestoj, sed strukturaj ŝanĝoj.

Dum la komercaj intertraktadoj inter Ĉinio kaj Usono en Ĝenevo, oni rezultigis provizoran tarifan armisticon, kaj ambaŭ flankoj restas singardaj. Altnivela engaĝiĝo estas ankoraŭ limigita, kun gravaj blokiĝpunktoj, ekzemple kritikaj mineralaj eksportaĵoj kaj teknologiaj limigoj, lasitaj nesolvitaj. Dume, tutmondaj provizoĉenoj restas sub streĉo, inflacia premo daŭras, kaj investanta konfido daŭre ŝanceliĝas pro kreskantaj necertecoj.

Mankas fina celo. Vaŝingtono ne esprimis specifan postulon aŭ postulon krom esprimi larĝajn zorgojn pri protekto de intelektaj proprietrajtoj, la "industria trokapacito" de Ĉinio, kaj la reloĝigo de sentemaj provizoĉenoj. Pekino ne trudis larĝajn kontraŭ-embargojn al Usono, sed ĝi klare deklaris, ke ĝi ne cedos nek permesos al si esti ĉikanata aŭ izolita rilate al la ekonomia fronto.

La ekonomia damaĝo de la usona tarifa politiko jam estas alta. Komence de aprilo, signifaj perdoj estis raportitaj de tutmondaj merkatoj dum mallonga komerca periodo. Inflacia premo kreskas, dum konsumprezoj estas projekciitaj pliiĝi dum la venontaj 18 monatoj. Multaj malgrandaj fabrikantoj en Usono, kiuj konsistigas la plimulton de la fabrikada sektoro de la lando, alfrontas fermojn, kun dungado en la sektoro akre malpliiĝanta, reflektante la pli larĝajn defiojn, kiujn alfrontas la industrio.

La sekva agado estas grava. Ĝi devus esti mezurita, principa kaj inteligenta.

---

*Massoud Amin, el la Instituto de Elektraj kaj Elektronikaj Inĝenieroj kaj la Usona Societo de Mekanikaj Inĝenieroj, estas prezidanto de Asocio pri Energia Politiko kaj Sekuro kaj emerita profesoro ĉe la Universitato de Minesoto, Usono.

Redaktoro: Xie Ruifeng

Facebook: Ĉina Fokuso / China Focus - Esperanto

Twitter: El Popola Chinio

WeChat: Skani la du-dimensian kodon por legi EPĈ en WeChat