Kiam Ĉinio lanĉis la strategion pri mildigo de malriĉeco, malsamaj solvoj estis alprenitaj por redukti malriĉecon, interalie la translokigo de homoj el lokoj sen ekonomiaj perspektivoj al aliaj lokoj, kie ili povus pli facile prosperi en la vivo. Nujiang-a Industria Parko pri Verdaj Spicaĵoj estis fondita de la Ĉina Kompanio pri Komunikado kaj Konstruado (CCCC, laŭ la angla mallongigo) kun la misio esti centro por provizi laboroportunojn al translokigitoj kaj disvolviĝi kiel Ekzempla Bazo pri Kunligo de Moderna Agrikulturo kaj Disvolvado kaj Ekzempla Bazo pri Teknologio kaj Novigo en Kampara Revigliĝo.

Parto de la parko

La parko kovras areon de 664 hektaroj, inkluzive de 65 hektaroj por konstruado, kaj estas aranĝita laŭ la modelo "unu akso, du koridoroj kaj tri zonoj". La akso estas tiu laŭ la valo. La du koridoroj estas ekologia koridoro, en formo de la litero Y, akompanante laŭlonge de du riveretoj, kiuj tie kuniĝas. Kaj la tri zonoj estas zono por novigaj entreprenoj, zono por procezado de spicaĵoj kaj montar-areoj por kultivado de spicaĵoj.

Laboristoj pakas citrontranĉaĵojn, unu el la lokaj produtoj.

Kunlabore kun registaro, firmaoj kaj sciencaj institucioj, la parko aplikas la spertojn de la Ĉina Akademio pri Tropika Agrikulturoscienco en esplorado kaj novigo por allogi firmaojn kaj estigi ampleksan sistemon, kiu kunligas produktadon, esploradon kaj pli vastan influon. Krom esti ekzemplo pri kunligo de industrio kaj agrikulturo, la loko ankaŭ fariĝis nacinivela turismejo kaj funkcias kiel provinc- kaj urb-nivela bazo por scienca edukado.

Partoprenantoj de ĉijara Nujiang-forumo vizitas la parkon kaj vidas lokajn produktojn.

Raportis kaj fotis: Rafael Henrique Zerbetto

Facebook: Ĉina Fokuso / China Focus - Esperanto

Twitter: El Popola Chinio

WeChat: Skani la du-dimensian kodon por legi EPĈ en WeChat