La 29-an de marto okazis en Lushui-urbo de Nujiang-a Lisu-a Aŭtonoma Subprovinco de Yunnan-provinco, sudokcidenta Ĉinio, Nujiang-forumo pri Regado de Malriĉeco kaj Tutmonda Disvolvado, kungastigita de la registaro de Yunnan-provinco, Ĉina Internacia Komunika Grupo (ĈIKG) kaj Ĉina Asocio pri Publikaj Rilatoj. La temo de ĉijara forumo estis "kune antaŭenigi kamparan revligiĝon kaj kundisvolvadon".

Du Zhanyuan, prezidanto de ĈIKG, parolas en la inaŭguro de la forumo.

Por interŝanĝi opiniojn, prezenti spertojn kaj esplorojn, kaj pridiskuti kunlaborojn kadre de la temo de la forumo, ĝin ĉeestis altranguloj de ĉina registaro kaj membroj de la Komunista Partio de Ĉinio (KPĈ), diplomatoj, gvidantoj de firmaoj, kaj ankaŭ spertuloj, profesoroj kaj fakuloj el malsamaj rondoj. Ĵurnalistoj el Ĉinio kaj aliaj landoj surloke raportis pri la forumo en pluraj lingvoj.

Nujiang estas modelo de etna unueco kaj progreso: Tie vivas 535 mil homoj el 42 etnoj, kaj 89.31% de ĝia loĝantaro apartenas al etnaj minoritatoj. Inter ili, la etnoj Dulong kaj Nu troviĝas nur en Nujiang. La loko havas 450 kilometran landlimon kun Birmo kaj 98% de ĝia areo konsistas de montoj kaj kanjonoj. Nujiang ankaŭ estas nacia modela regiono pri ekocivilizacio, kun abundo da naturaj resursoj, inkluzive de akvo, arbaroj, bestoj kaj plantoj, kaj mineraloj. Krome, la belaj naturaj vidindejoj kaj la riĉa kulturo igas ĝin loko plena je perspektivoj por disvolvado.

Kvankam tie abundas resursoj por disvolvado, tamen iam 56.24% de ĝia loĝantaro vivis en malriĉeco. Sub la gvido de la Centra Komitato kaj de la Yunnan-a Provinca Komitato de KPĈ, kaj subtene de frataj urboj pere de la ĝemel-programo inter orientaj kaj okcidentaj ĉinaj urboj, Nujiang sukcesis malaperigi malriĉecon kaj fariĝis ekzemplo de Ĉinio en mildigo de malriĉeco kaj kampara revigligo, aparte por etnaj minoritatoj.

Post la venko en la lukto kontraŭ malriĉeo, Nujiang nun antaŭenigas kamparan revigliĝon.

En sia parolo en la inaŭguro de la forumo, Du Zhanyuan, prezidanto de ĈIKG, substrekis la rolon de Nujiang-forumo en estigo de partnerecoj inter disvolviĝantaj landoj cele al antaŭenigo de inkluzivigo kaj daŭripoveco en kamparo. Li menciis la Iniciaton por Malferma Scienca Kunlaboro, pasintjare lanĉita de Ĉinio, Brazilo, Sud-Afriko kaj Afrika Unio, kun la celo profitigi la tutmondan sudon el la fruktoj de novigo.

Posttagmeze, en ronda diskuto sub la temo "verda disvolvado kiel akcelilo de kampara revigliĝo", Douglas de Castro, brazila profesoro de la Lernejo pri Juro ĉe Universitato de Lanzhou, eĥis la vortojn de Du, substrekante, ke Brazilo kaj Ĉinio komplementas unu la alian en tiu kampo. "La malalta financa kapablo de Brazilo rezultas en modelo moldita el la malsupro, centrita en familia agrikulturo favora al loka distribuado de manĝaĵoj kaj konservado de tradiciaj scioj, kaj tio influas la disvolvadon de politikoj por mildigi malriĉecon. En Ĉinio, la modelo estas moldita el la supro, ĉar la investokapablo estas granda, do la produktado de manĝaĵoj ŝanĝiĝas laŭ la investoj alvenas en la komunumoj. Ambaŭ modeloj havas siajn avantaĝojn, kaj per interŝanĝoj kaj kunlaboro ni povas kunkrei modelon eĉ pli bonan," klarigis li.

Profesoro Anatoly Tozik, prezidento de Belorus-ĉina Amikeca Societo, emfazis, ke malriĉeco estas plurdimensia: Homoj ne havas manĝaĵon, ne havas loĝejojn, ne havas aliron al lernejo kaj koracado ktp, kaj estas parto de civiliza krizo politika, media kaj spirita. Li laŭdis la proponon de Ĉinio pri konstruado de la homara komunumo de komuna estonteco kaj la ekzemplon donitan de Ĉinio al la mondo per malaperigo de ekstrema malriĉeco el la lando. Ĉinio pruvis, ke malriĉeco ne estas io neevitebla, sed ja povas esti malaperigita per antaŭenigo de taŭgaj disvolvaj politikoj.

Nujiang estas modelo de etna unueco kaj progreso.

Irina Bokova, eksa ĝenerala direktoro de Unesko, priatentis la fakton, ke Ĉinio estas la unua lando, kiu sukcesis plenumi la unuan Daŭripovan Evoluigan Celon de UN, nome malaperigo de malriĉeco, kaj Yunnan estis unu el la ĉefaj batalkampoj de la lukto kontraŭ malriĉeco. Ŝi diris, ke post tiu grava atingo, Ĉinio donis al si la novan mision preventi revenon de malriĉeco kaj antaŭenigi progreson per la strategio de kampara revigliĝo. Ĉinio donis gravan ekzemplon al la mondo, kaj ĝia progreso profitigis ne nur ĉinojn, sed ankaŭ la tutan homaron.

En la evento ankaŭ estis oficiale lanĉita la raporto Novaj Perspektivoj por Kampara Revigliĝo — Esploroj kaj Praktikoj en Nujiang, anoncita la nemateria kultura heredaĵo de Nujiang "oranĝa ateliero", kaj subskribita interkonsento pri strategia kunlaboro inter la registaro de Nujiang kaj la firmao iFLYTEK.

Raportis: Rafael Henrique Zerbetto

Facebook: Ĉina Fokuso / China Focus - Esperanto

Twitter: El Popola Chinio

WeChat: Skani la du-dimensian kodon por legi EPĈ en WeChat