| Ĉina sondilo sukcese surmarsiĝis |
| 2021-05-17 |
La 15an de majo, surmarsiĝilo portanta la unuan marsan ĉaron de Ĉinio lante falis sur la ruĝan planedon. Estas la unua fojo, ke Ĉinio sendis sondilon sur alian planedon. Tianwen-1, konsistanta el orbitilo, surmarsiĝilo kaj ĉaro, estis ĵetita de la Wenchang-a Kosmodromo en la sudĉina provinco Hainan la 23an de julio 2020. Tio estis la unua paŝo en la ĉina planeda esplorado de la suna sistemo, kun la celo fari orbitadon, surmarsiĝon kaj vagadon sur la ruĝa planedo en la sama misio. La nomo Tianwen, signifanta demandojn al la ĉielo, venas de la poemo verkita de antikva ĉina poeto Qu Yuan (ĉirkaŭ 340 a.K.-278 a.K.). Ĉinio nomas sian unuan mars-ĉaron Zhurong, dio de fajro en la antikva ĉina mitologio, kiu eĥas kun la ĉina nomo de la ruĝa planedo: Huoxing (la planedo de fajro). La kosmoveturilo eniris la marsan orbiton en februaro post vojaĝo de preskaŭ sep monatoj tra la spaco, kaj restis en orbito dum pli ol du monatoj por esplori eblajn surmarsiĝejojn. (el ĈRI) Redaktoro: Liu Zijia Facebook: Ĉina Fokuso / China Focus - Esperanto Mojosa Ĉinio
|
