de YUE LIANGUO

    TPK kaj ĈPPIK de 2009 altiris al si multajn fremdlandanojn. Antaŭtagmeze de la 5-a de marto, pli ol 1000 alilandaj raportistoj kaj diplomatoj aŭskultis la raporton faritan de ĉina ĉefministro Wen Jiabao. La de ili atentata fokusa temo estas la rimedoj alprenotaj de Ĉinio kontraŭ la financa krizo.

    "La politikoj alprenotaj de Ĉinio kontraŭ la financa krizo estas gravaj, ĉar ili rilatas ne nur al Ĉinio, sed ankaŭ al la tuta mondo," diris la norvega ambasadoro en Ĉinio.

    Unuaklasa sekretario de belorusia ambasadorejo en Ĉinio diris: "Nun, la tuta mondo metas grandajn esperojn sur la ekonomio de Ĉinio, kaj esperas, ke ĝi fariĝos ĉefa forto por stabiligi la mondan ekonomion." Li diris ankaŭ, ke kvankam influata de la monda financa krizo, la ekonomio de Ĉinio ankoraŭ disvolviĝis rapide en la pasinta jaro. Nun multaj landoj antaŭvidis, ke ilia ekonomio malkreskos en la kuranta jaro, sed Ĉinio difinis aŭdacan celon de kreskado de ĝia ekonomio. "Mi estas optimisma pri realiĝo de la ekonomia celo de Ĉinio en la kuranta jaro," diris la belorusa diplomato. "Mi kredas, ke Ĉinio kapablas kontraŭi la influon de la monda financa krizo al la ekonomiaj unitoj, kaj opinias, ke sperto de Ĉinio estas lerninda por Belorusio."

    La ĉefa delegito de la Azia Disvolva Banko en Ĉinio diris: "Mi multe atentas la detalajn aranĝojn de la ekonomia plano de Ĉinio kun totala sumo de 4000 miliardoj da juanoj, samtempe, mi prizorgas la problemon de ĝia popola vivo, ĉar tio strikte rilatas kun traktado de la financa krizo.

    Se Ĉinio bone solvos la problemojn de la popola vivo, kiaj laborigo, edukado kaj kuracado, la popolo do senhezite elspezos, kio ja utilas al la enlanda konsumado."

    Diplomato de Finnlando en Ĉinio diris, ke li atentas, ke por efike kontraŭi la financan krizon kaj solvi problemon koncernantan al la popola vivo, ĉina ĉefministro Wen Jiabao kolektis popolajn opiniojn per interreto antaŭ la inaŭguro de TPK kaj tiu de ĈPPIK, kaj demandoj en tiu agado estis traktitaj en la raporto.

    Estro de la Pekina Filio de la Internacia Informada Grupo Interfakso de Rusio diris: "En la pasinta jaro kvankam Ĉinio estis influita de la monda financa krizo, tamen la disvolva situacio de la ĉina ekonomio restis bona kompare kun tiu de aliaj landoj."

    Raportisto de itala amaskomunikilo diris: "Antaŭ ol veni al Pekino, mi volis informiĝi pri tio, kion faris la ĉina registaro por ke ĝia popolo tenu la fidon, kaj la raporto de Wen Jiabao prezentis multajn metodojn por tio. Mi legis ĝin kaj certiĝas, ke multaj metodoj en ĝi konformas al bezonado de popolanoj." Tiu raportisto diris ankaŭ, ke li bezonas pli longan tempon por multfoje legi la raporton. "Eble, tio estas ŝlosilo por solvi la problemojn kaŭzitajn de la financa krizo."

   En la inaŭgurejo de TPK, multaj alilandaj raportistoj kun granda atento aŭskultis la raporton, faris substrekojn sur la teksto, jen kaj jen rigardis tra lorno al la podio.

    Aŭdinte la raporton de ĉina ĉefministro Wen Jiabao, hispana raportisto diris al tiu el la Xinhua-a Novaĵ-agentejo: "La ĉina registaro publikigis multajn novajn rimedojn kontraŭ la financa krizo. Mi kredas, ke ili certe ludos bonan rolon." Tiu raportisto rimarkis, ke en la pasintaj jaroj ĉiam rapide disvolviĝis la ekonomio de Ĉinio, "la ĉina registaro estas sperta en ekonomia laboro, kaj ni devas konfidi ĝin."