Ĉina prezidanto Hu Jintao (dekstre) kaj prezidanto de IHOK Philip Craven en la ferma ceremonio

    Vespere de la 17-a de septembro okazis la ferma ceremonio de la Pekinaj Handikapulaj Olimpikoj (PHO) en "Birdnesto" -- la Nacia Stadiono de Ĉinio. Miloj da handikapitaj sportistoj, trejnistoj kaj gastoj el diversaj landoj kaj regionoj celebris la sukcesojn de PHO kune kun la 90 mil spektantoj.

    "Du Olimpikoj estas same brilaj" estas promeso de Ĉinio al la mondo. Sur la sportejoj de PHO pli ol 4 mil handikapitaj sportistoj el 147 landoj kaj regionoj brave konkursis, novigis 279 mondajn handikapulajn rekordojn kaj 339 rekordojn de Handikapulaj Olimpikoj.

Prezidanto de OKPO Liu Qi faras parolon.

    Post brila arta prezentado en la ferma ceremonio, prezidanto de la Organiza Komitato de la Pekinaj Olimpikoj (OKPO) Liu Qi faris parolon. En la nomo de OKPO li gratulis la sportistojn partoprenantajn PHO kaj dankis la Internacian Handikapulan Olimpikan Komitaton (IHOK), Handikapulan Olimpikan Komitaton de diversaj landoj kaj regionoj, la internacian organizon de handikapulaj sportoj, la volontulojn kaj tiujn, kiuj kontribuis al PHO. Liu Qi esprimis ankaŭ sinceran bondeziron al ili.

Prezidanto de IHOK Philip Craven faras parolon.

    Prezidanto de la Internacia Handikapula Olimpika Komitato Philip Craven faris parolon en la ferma ceremonio. Li laŭdis, ke PHO estas la plej grandaj handikapulaj Olimpikoj en la historio de la handikapulaj Olimpikoj. Li esperis, ke ĉiuj sportistoj, trejnistoj kaj oficistoj portos la sportan spiriton de PHO al ĉiuj lokoj de la mondo por kuraĝigi pli da homoj partopreni sportojn, amikiĝi kun aliaj kaj bruligi sian animan fajron.